Sekretáriu Estadu Ambiente, Demétrio do Amaral de Carvalho lansa ofisiál ba fábrika transformasaun lixu ba materiál konstrusaun ne’ebé estabelese husi empreza Caltech. Imajen/Mídia-SEA

DILI, 05 juñu 2020 (TATOLI) – Sekretáriu Estadu Ambiente, Demétrio do Amaral de Carvalho, halo lansamentu ofisiál fábrika transformasaun lixu ba materiál konstrusuan ne’ebé estabelese hosi empreza Caltech ho Heineken, no servisu hamutuk Mercy Coorps inklui Ajénsia Dezenvolvimentu.

Iha lansamentu fábrika produsaun ne’e, Sekretáriu Estadu Demétrio agaredese tebes ba inisiativa empreza ne’ebé servisu hamutuk hodi estabelese fábrika resiklajen lixu ne’e.

“Ohin, ha’u halo lansamentu ofisiál ba fábrika dahuluk iha Timor-Leste ne’ebé halo resiklajen plástiku ba materiál konstrusuan ka produtu ida ne’ebé importante tebes no fábrika ne’e prodúz ona paving hamutuk 2000-resin, husi sira-nia ezersísiu prosesu ne’e,” tenik Demétrio hafoin seremónia lansamentu iha Beduku, Comoro, sesta ne’e.

Nia dehan, iha loron 5 juñu 2020, iha mundu tomak selebra loron Ambiente nian ho tema sentrál ba loron internasionál nia mak tempu ba natureza no harii infraestutura esensiál, ne’ebé  iha Timor Leste adapta tema ne’e ho vizaun ida atu harii infraestutura esensiál ne’ebé emperza Caltech estabelese ona ho objetivu Timor-Leste ida moos, matak no saudável.

Caltech hanesan empreza nasionál ne’ebé harii tinan 20-resin ona hodi halo servisu importante ba resiklajen no tinan barak ona envolve iha resiklajen sira hahú resiklajen kaixa no seluk tan.

“Ita hatenen katak lixu plástiku ne’ebé resiklajen ba paving bele uza ba halo buat barak hanesan jardin, uma no liuliu ita konsege transforma ona plástiku ne’ebé hafo’er ita-nia ambiente hanesan tasi no esgotu sira ba produtu ida ne’ebé valór tebes,” nia akresenta.

Atu minimiza lixu plástiku, tuir eis Deputadu Bankada Partidu Libertasaun Populár (PLP) ne’e, la depende ba Sekretaria Estadu Ambiente (SEA) ka empreza sira, maibé depende ba asaun sosiedade tomak mak foin garante Timor-Leste ida moos, saudável no matak.

“Ne’e ita hotu nia resposabilidade hanesan sidadaun, hahú husi labarik to’o inan-aman. Entaun bainhira ita boot, sira hemu bee uza fatin plástiku karik hafoin ba sosa sasán karik proíbidu so’e ba esgotu sira no so’e ba fatin ne’ebé la aproriadu maibé rai hamutuk hodi mai iha fatin ne’e hodi halo osan,”nia sujere.

Ho nune’e, governante ne’e agradese tebes empreza no parseiru dezenvolvimentu sira ba lansamentu dahuluk ne’e no Governu sei tenta buka rekursu hodi insentiva ba empreza sira.

“Ita mai iha ne’e atu apoia no enkoraja sira karik, ita iha rekursu ita intensivu ho Caltech ne’e atu sira ninia intervesaun sustentável liu no fó impktu boot ba ita-nia rai,” nia reforsa.

Empreza Caltech, hamutuk ho Heineken, inklui ajénsia internasionál hanesan JICA, KOICA, USAID no Uniaun Europeia apoia fundu ba Mercy Corps kuaze millaun $4-resin atu halo resiklajen lixu ba materiál konstrusaun.

Inisiativa husi kompañia rua ne’e hakarak halo lansamentu ofisiál ba resiklajen lixu sai matéria konstrusaun hodi apoiu polítika Governu liuhosi SEA atu implementa polítika kona-ba zero plástiku.

Produsaun Lixu ba materiál uzada sei fó benefísiu hanesan minimiza porsentu 20 lixu plástiku ne’ebé kontein iha ambiente no aplika ekonomia sirkulár hodi transforma lixu ne’ebé laiha valór ba materiál ne’ebé iha valór.

Tuir dadus 2015, Dili kada loron prodús lixu tonelada 200 ne’ebé bainhira foti porsentu 20 husi plástiku ne’e entre tonelada 40 to’o 50 ba materiál konstrusaun maka bele ajuda minimiza impaktu ba ambiente no bele fó rendimentu ba entidade ne’ebé halo atividade atividade no prodús lixu.

Produsaun lixu ne’e, halo teste ona no hatudu kualidade di’ak ba jardín no estrada ninin sira ne’ebé importante ba solusiona lixu iha nasaun ne’e.

Mákina ne’ebé Caltech iha la’ós mákina ida boot hodi bele transforma tonelada 150 kada loron nian, maibé sira-nia kapasidade produsaun ho mákina bele prodúz tonelada 4 to’o 5 kada loron.

Empreza Caltech ho esforsu rasik halo tratamentu ba lixu ka resiklajen ba kaixa mamuk, botir, ákua no mós sunu sasán ospitalár atubele mellora ambiente iha país ne’e.

Polítika zero plástiku ne’e define ba prioridade tanba Timor-Leste nia kuantidade lixu plástiku ne’ebé prodúz porsentu 18 to’o 20.

Bazeia ba lei baze ambientál númeru 26/2012 no lei numeru 2/2017, kona-ba sistema jestaun rezíduu sólidu urbanu no dekretu lei 32/2016 kona-ba estratéjia hodi melloramentu jestaun lixu urbana sira, sei hasai mós sirkulár ida ba empreza sira atu fó avizu ba kompradór atu hahú utiliza ona pasta amigável ho ambiente.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here