Primeiru-Ministru, Taur Matan Ruak Sorumutuk ho Ministru Administrasaun Estatal, Miguel Pereira Carvalho iha Palásiu do Governu. Sexta (05/06). Imajen/Egas Cristovão

DILI, 05 juñu 2020 (TATOLI)–Primeiru-Ministru, Taur Matan Ruak, ohin, oriénta Minsitériu Admiistrasaun Estatál (MAE) atu partisipa no apoiu autoridade munisipál sira iha territóriu Timor laran tomak bainhira hala’o prosesu pagamentu subsídiu ba uma-kain iha ámbitu pandemia COVID-19 ne’e.

Notísia Relevante: Governu Benefísia Uma-Kain 298.119 iha Munisípiu 12

Ministru Administrasaun Estatál (MAE), Miguel Perreira de Carvalho, hateten Primeiru-Ministru orienta nia atu hamatan ba autoriddade munisípiu, munisipál, no autoridade lokál hodi fó apoiu Ministériu Solidariedade Sosiál no Inkluzaun (MSSI) ba prosesu realizasaun pagamentu subsídiu ba komunidade sira.

Ministru Administrasaun Estatál (MAE), Miguel Pereira de Carvalho. Imajen/Egas Cristovão

“Ohin, enkontru ho Primeiru-Ministru, PM oriénta ha’u atu ba haree Administradór Munisípiu no Postu Administrativu sira inklui ho lideransa komunitária no membru konsellu suku sira atu fó apoiu ba Ministériu Solidaridade Sosiál no Inkluzaun ne’ebé mak iha tersa-feira semana oin, realiza apoiu pagamentu subsídiu iha ámbitu pandemia COVID -19 nian, ba ita-nia sidaudaun iha suku hotu-hotu,” dehan Ministru Administrasaun Estatál (MAE), Miguel Perreira de Carvalho, ba jornalista sira hafoin hala’o enkontru ho Primeiru-Ministru, Taur Matan Ruak, iha Palácio do Governo, sesta ne’e.

Ministru ne’e hatutan, ekipa pagamentu halo pagamentu ba suku sira hamutuk 452 maibé ekipa Rejiaun Administrativu Espesiál Oé-Cusse Ambeno (RAEOA) nian mak sei hasai, entaun Munisípiu seluk sei hahú fahe orsamentu subsídiu ba iha suku no aldeia sira hotu iha semana oin ne’e.

“Ohin, MAE simu ona orientasaun hosi Primeiru-Ministru atu apoiu Ministériu Solidaridade Sosiál no Inkluzaun para halo pagamentu ho di’ak no hodi garante katak ita-nia komunidade sira bele marka prezensa hotu ba iha fatin ne’ebé mak ekipa sei ba halo pagamentu,” Ministru ne’e hateten.

Tanba ne’e, nia parte sei oriénta Diretór Jerál no Nasionál sira ho ekipa ida sei tún ba Munisípiu hahú segunda-feira (08/06/2020) semana oin.

“Munisípiu sira hotu, ha’u orienta ona atu Diretór Jerál no Nasionál sira ho ekipa ida sei tún ba Munisípiu hahú segunda-feira semana oin para atu servisu hamutuk ho Administradór Munisípiu sira hotu, atu nune’e hato’o informasaun ba lidér komunitáriu sira, nune’e, atu hala’o funsaun pagamentu ho di’ak. Partikularmente mobiliza ita-nia komunidade sira atu ba fatin ne’ebé prepara hodi simu subsídiu $200,” dehan governante ne’e.

Prosesu pagamentu ne’e realiza, tuir nia, tanba durante ne’e autoridade komunitáriu hamutuk ho autoridade munisipál rekolla ona dadus uma-kain ne’ebé entrega ba MAE, depois halo kompilasaun hafoin entrega ba MSSI hodi ohin loron hetan uma-kain hamutuk 298.119 ne’ebé sei simu iha semana oin.

Nia informa, lista dadus benefisiáriu no lista esklui haruka hotu ona ba munisípiu sira hodi taka sai iha sede suku no aldeia, hodi komunidade sira haree katak ida ne’ebé mak elizivél mak simu. Governu esklui ne’e sei bazeia ba regra ne’ebé mak iha katak rendimentu liu $500 ba leten mak sei halo esklui katak laiha direitu.

Aleinde ne’e, nia hateten, Primeiru-Ministru mós haruka ona Ministériu Administrasaun Estatal (MAE) atu hahú halo planu ba proposta Orsamentu Fiskál tinan 2020-2021 nian.

“Primeiru-Ministru orienta ha’u hanesan membru Governu foun atu hahú halo ka ko’alia planu Ministériu Administrasaun Estatal nian para bele hatuur proposta ba iha Orsamentu tinan fiskál ba 2020-2021 nian,” nia dehan.

Jornalista : Osória Marques

Editór      : Cancio Xime

HAKEREK NO HATÁN

Please enter your comment!
Please enter your name here