Imajen Tatoli/Evaristo Soares Martins.

DILI, 05 juñu 2020 (TATOLI)—Prezidente Partido Democrático (PD), Mariano Assanami Sabino, hateten PD mantein prinsípiu katak dalan únika solusiona impase polítiku iha rai-laran mak diálogu entre líder partidu polítiku sira.

Notísia Relevante: PD Halo Reflesaun no Hanoin Hikas Prinsípiu Saudozu La Sama

Nia hatutan, PD kaer nafatin prinsípiu viabiliza nafatin hodi viabiliza ba Governu ida-ne’ebé ke liubá no ohin loron PD mantein nafatin viabiliza Governu ida-ne’e tenke la’o bá-oin hodi hakotu impase politika.

“PD kaer-metin prinisípiu katak atu hakotu impase ne’e aposta nafatin diálogu. Balun ukun no balun iha li’ur maibé ita tenke nafatin koa’lia ba-malu hodi lori rai ida-ne’e bá-oin. PD kaer nafatin prinsípiu katak viabiliza nafatin. Ami opozisaun mós viabiliza ba governu ida-ne’ebé ke liubá no ohin ami mantein nafatin viabiliza governu ne’e tenke la’o bá-oin hodi hakotu impase,” dehan Mariano Assanami Sabino liuhosi Konferénsia Imprensa ne’ebé hala’o iha Sede PD, Colmera, Dili, sesta ne’e.

Assanami argumenta, aposta diálogu nafatin tuir prinsípiu PD nian ne’e la’ós atu fahe kadeira ba-malu no la’ós atu halo kompromisu maibé rekoñese malu katak rai ida-ne’e timoroan hotu nian tenke la’o bá-oin.

Prezidente Partido Democrático ne’e louva líder nasionál sira hanesan Xanana Gusmão, Taur Matan Ruak, Francisco Guterres ‘Lu Olo’, Lere Anan Timur no Marí Alkatiri maibé líder hirak ne’e tenke tuur hamutuk lori rai ida-ne’e bá-oin.

“Mekanizmu konstitusionál ba diálogu ne’e iha hela katak Prezidente Repúblika mak sei bolu nafatin partidu sira para ko’alia asuntu nasionál sira, ko’alia kona-ba problema, ko’alia kona-ba COVID-19 no ko’alia kona-ba povu hamlaha,” nia dehan.

Assanami dehan, la’ós dehan demokrásia hili maioria no minoria maibé diálogu ne’e tenke sai kultura ida ba problema hotu-hotu iha nasaun ida-ne’e enfrenta.

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here