iklan

NASIONÁL, HEADLINE, OÉ-CUSSE (RAEOA), POLÍTIKA

Molok Pagamentu, Autoridade RAEOA Sei Loke Uluk Konta Bankária ba Kada Suku

Molok Pagamentu,  Autoridade RAEOA Sei Loke Uluk Konta Bankária ba Kada Suku

Xefe Gabinete Prezidente Autoridade Rejiaun Administrativa Espesiál Oé-Cusse Ambenu (RAEOA), Silvério Pinto Baptista, Imajen Tatoli/Egas Cristovão

DILI, 05 juñu 2020 (TATOLI)–Xefe Gabinete Prezidente Autoridade Rejiaun Administrativa Espesiál Oé-Cusse Ambenu (RAEOA), Silvério  Pinto Baptista,  informa hahú kedan iha Sesta (05/06) ne’e Autoridade servisu hamutuk ho parte Banco Nacionál Comércio Timor Leste (BNCTL) hodi loke númeru konta bankária ba kada suku hosi suku sanulu resin ualu (18) iha Oe-Cusse, hafoin bele halo pagamentu ba subsídiu $100.

Notísia Relevante: Governu Seidauk Bele Halo Pagamentu Subsídiu ba Komunidade RAEOA

Silvério esplika, prosesu hotu-hotu hatudu katak munisípiu hotu preparadu atu halo pagamentu subsídiu COVID-19 ba komunidade, tanba Ministériu Finansa halo ona tranferénsia orsamentu ba konta bankária munsípiu ida-idak nian inklui konta bankária suku ida-idak nian.

“Eseptu RAEOA maka seidauk bele halo pagamentu tanba iha suku sanulu resin ualu (18), nem ida mak iha númeru konta bankária iha BNCTL,” Silvério esplika ba ba Ajénsia TATOLI liuhosi entrevesista via telefonika, sesta ne’e.

Silvério informa, antes ne’e iha duni akordu entre parte autoridade hamutuk ho diresaun prinsipál sira liuliu diresaun Finansa RAEOA nian atu halo transferénsia direta ba númeru konta bankária Autoridade nian, hafoin foti no entrega osan ne’e  ba parte finansa RAEOA hodi ba halo pagamentu, maibé iha mudansa bazeia ba desizaun hosi Ministra Solidariedade Sosiál no Inkluzaun, Armanda Berta dos Santos, iha semana kotuk.

“Antes ne’e ita husu kedan oinsá mak osan ne’e transfere. Bainhira  ha’u konsulta ho parte finansa RAEOA hateten, bele uza konta bankária autoridade nian atu bele transfere mai depois mak autoridade foti no entrega ba diretór finansa, atu sira servisu hamutuk ho MSSI RAEOA ninian, ne’ebé mak sei forma ekipa ida hodi halo pagamentu,” nia esplika.

Nia hatutan, prosesu primeiru ne’e la’o duni hanesan ne’e maibé iha semana kotuk parte autoridade ita simu fali karta ida hosi Ministra Solidariedade Sosiál no Inkluzaun, ne’ebé husu atu hala’o enkontru ida hodi bele indika pontu vokál balun atu bele organiza oinsá loke konta bankária ba kada suku.

“Tanba ne’e mak horisehik ha’u ko’alia ona ho sira diresaun finansa RAEOA, atu hare asuntu ne’e, katak ohin (sesta, 05/06) hahú loke ona konta bankária kada suku iha BNCTL. Maibé, tanba ohin ema servisu loron sorin de’it, enkuantu ita iha hela situasuan estadu emerjénsia, nune’e sei kontinua aselera no konklui kedan iha segunda semana oin. Bainhira konklui ona, sei haruka fali mai iha MSSI nasionál, atu bele transfere osan ida-ne’e ba númeru konta bankária ne’ebé mak ita loke ona ba kada suku,” nia subliña.

Nia dehan tan, objetivu hosi transferénsia direta ba iha númeru konta bankária kada suku atu bele uniformiza ho munisipiu sira seluk, ne’ebé mós transfere direta ba konta bankária suku ida-idak nian.

Xefe gabinete ne’e mós relata tan, problema seluk mak tuir orientasaun katak osan ida-ne’e transfere tiha depois parte kompetente sei ba foti no sei tau iha brankas suku ida-idak nian, enkuantu to’o agora iha RAEOA nem suku ida mak iha ninia brankas rasik.

“Maski nune’e, autoridade buka ona solusaun, ne’ebé konsulta ho parte Ministériu Administrasaun Estatál liu-hosi servisu Programa Nasionál Dezenvolvimentu Suku (PNDS) iha kada suku, sei oferese sira nia brankas atu bele uza hodi rai osan ne’e, hodi halo pagamentu,” nia haktuir.

Tuir Silvério, númeru benefisiáriu ba subsídiu $100  iha RAEOA hamutuk família 20.000 resin.

Entretantu, RAEOA iha Suku 18 mak hanesan, Suku Costa, Cunha, Lalisuk, Nipane, Naimeko, Lifau, Taiboko, Bobokase, Lela-ufe, Suni-ufe, Ban-Afi, Usi-taku, Bene-ufe, Malelat, Abani,  Usitasae, Usitaqueno no Bobometo.

Dadus husi Administrasaun Estatál RAEOA tinan 2020 hatudu katak, Oecusse iha uma kain hamutuk 19.839, iha sub-rejiaun haat no aldeia 63.

Jornalista : Cipriano Colo

Editór       : Cancio Ximenes

iklan
iklan

One Comment

  1. Ooops Oekusi oan iha nebe..Xefi Gabinete PA deit hosi Dili…lakleur sover mos rekruta hosi Dili @@@

Leave a Reply

iklan
error: Content is protected !!