Juiz Administradár Tribunal Distritál Dili, Afonso Carmona. Imajen/Domingos Piedade.

DILI, 05 juñu 2020 (TATOLI) – Juiz Administradór Tribunál Distritál Dili (TDD), Afonso Carmona, afirma durante ne’e juiz sira la viola direitu labarik sira-nian iha kualkér  julgamentu ne’ebé iha relasaun ho labarik sira nia kazu.

Notísia Relevante : Juís Sira iha Tribunál Viola Labarik Sira-Nia Direitu

“Tribunál la viola labarik sira-nia direitu no garante ema hotu nia direitu hanesan iha lei nia oin,” hateten Afonso Carmona, hodi responde  ba Agência Tatoli, ohin, iha nia kna’ar fatin, hodi responde preokupasaun Uma Mahon ba Fundasaun Forum Komunikasaun Juventude (F-FCJ) Oratóriu Dom Bosco nian, ne’ebé levanta katak, juiz sira iha tribunál viola labarik sira-nian direitu tanba adia hela de’it julgamentu ba labarik sira-nia kazu.

Afonso Carmona hateten, Tribunál hala’o nia funsaun tuir regra prosesuál, tanba ne’e ba prosesu sira hotu ne’ebé tama iha tribunál balun tama uluk no juiz sira halo markasaun oráriu sei la’o tuir.

“Maibé kuandu juis sira simu akuzasaun signifika prosesu prienxe regra atu halo prosesuál, ho nune’e, marka loron audiénsia julgamentu. importante, vítima, testemuña, tenke marka prezensa,” esklarese Afonso Carmona.

Nia hatutan, bainhira testemuña no parte sira la mai partisipa iha audiénsia julgamentu, automatikamente julgamentu tenke adia fali.

“Ita tenke aplika regra sira ne’e ba ema hotu, tantu ba labarik sira, dalaruma tribunál labele realiza julgamentu tanba ho razaun prosesuál,” nia esplika.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here