Presidente Institutu Nasionál Seguransa Sosiál (INSS) Longuinhos Armando. Imajen/Nelson de Sousa

DILI, 05 juñu 2020 (TATOLI)–Prezidente Institutu Nasionál Seguransa Sosiál (INSS), Longuinhos Armando, informa INSS esklui ona ema (funsionáriu) sira ne’ebé mak simu saláriu ka rendimentu liu $500 ba leten hamutuk 2.538 hosi totál dadus subsídiu uma-kain iha Timor-Leste ne’ebé simu hosi Ministériu Administrasaun Estatal (MAE) hamutuk 303.920

Notísia Relevante: Governu Benefísia Uma-Kain 298.119 iha Munisípiu 12

“Dadus pagamentu ne’ebé mak ami simu hosi Ministériu Administrasaun Estatal mak 303.920. Depois atu esklui ba ema (funsionáriu) sira ne’ebé mak simu saláriu ka rendimentu liu $500 ba leten hamutuk ema 2.538,” Prezidente Institutu Nasionál Seguransa Sosiál (INSS), Longuinhos Armando, ba Ajénsia TATOLI iha nia knaar fatin MSSI, Caicoli, Dili,sesta ne’e.

Nia hatutan, dadus hosi uma-kain 2.538 ne’ebé mak nia rendimentu liu $500 mak funsionáriu xefia no Diretór sira.

Nia dehan, aleinde fó subsídiu $100 ba agregadu familiar ne’e Governu mós hanoin hakarak fó subsídiu ba traballadór sira liuhosi kompañia ho hanoin ida iha situasaun COVID-19 ne’e abele hapara ka labele hamenus traballadór sira, tanba ne’e mak Governu hakarak atu ajuda tan kompañia ba sira-nia saláriu ho 60%.

“Agora prosesu ita hala’o daudauk no rejistu mós taka tiha ona. Tanba tuir diploma ministeriál númeru 17 hatete katak ami loke rejistu loron 15 de’it, maibé ba Kompañia sira ne’ebé foun komesa dekretu leí ne’e hahú. Nune’e iha loron 27 maiu parte seguransa sosiál (SS)  termina ona atividade rejistu nian,” nia haktuir.

Ba kompañia tuan ne’ebé hakarak atu reembolsa ne’e, nia hateten, Institutu Nasionál Seguransa Sosiál (INSS) fó de’it data limitasaun ba to’o loron 30 juñu agora ne’e.

“Bainhira iha kompañia foun ka traballadór foun ruma mak hakarak mai rejistu INSS simu nafatin. Maibé, razaun ida katak sira mai atu kumpre sira-nia dever ida ba iha Seguransa Sosiál ne’e hodi asegura sira-nia servisu bainhira sira-nia avansadu ona, hodi bele kontinua hetan osan hosi SS maibé la’ós atu ba subsídiu traballadór ne’e. Tenke entende ida ne’e,” nia esplika.

Notísia Relevante: Subsídiu Traballadór 60% Sei iha Prosesu Verifikasaun

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here