Diretóra Jerál Prestasaun Saúde, Ministériu Saúde (MS), Odete Viegas da Silva. Imajen/Egas Cristovão

MALIANA,05 juñu 2020 (TATOLI)-Ekipa prevensaun COVID-19 husi Ministériu Saúde (MS) hamutuk ho Parseiru Internasionál hanesan Organizasaun Mundiál Saúde (OMS), UNICEF no seluk tan, hahú kinta horiseik hala’o vizita bá Fronteira Terrestre Motain hodi esplika importansia husi implementasaun Estadu Emerjénsia datoluk ba prevene propagasaun coronavirus mai Timor-Leste.

“Estadu emerjénsia datoluk ne’e nia prioridade mak oinsá atu reforsa servisu iha área fronteira entaun área fronteira ne’e mak fó prioridade ba Munisípiu haat mak hanesan Munisípiu Bobonaro, Covalima,Oé-Cusse, no Dili,”informa Diretóra Jerál Prestasaun Saúde, Odete Viegas da Silva ba Jornalista sira iha Maliana, sesta ne’e.

Odete dehan objetivu husi vizita ne’e mós atu oinsá kria liña koordenasaun di’ak liu hodi halo prevensaun ba surtu COVID-19 iha área fronteira terrestre.

“Ami mós haree fatin kuarentena iha ne’e iha ona maibé akomodasaun iha laran mak seidauk prienxe entaun ho vizita ida ne’e espera semana oin ami bele halo ona buat ruma ba fatin sira ne’e no prienxe ona alojamentu ba infraestutura ne’ebé mak iha ona,” tenik Odete.

Prosesu reabilitasaun fatin Kuarentena iha Motain finaliza ona hamutuk iha kuartu hamutuk 38 maibé seidauk kompleta ho ekipamentu hanesan kama, kulsaun no fasilidades seluk tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here