Enkontru virtual entre F-FDTL ho Forsa Armada Repúblika Populár Xina, sesta (05/06/2020). Imajen/Mídis F-FDTL

DILI, 05 juñu 2020 (TATOLI) – FALINTIL-Forsa Defeza Timor-Leste (F-FDTL) ho Forsa Armada Repúblika Populár Xina, troka esperiénsia kona-ba resposta ba prevensaun propagasaun surtu Coronavirus ka  COVID-19.

Liuhusi enkontru virtual entre parte rua, ohin, ne’ebé partisipa husi Xefe Estadu Maiór F-FDTL Koronél Calisto Santos ‘Coliati’, akompaña mós husi Asesór Estratéjiku ba Ministériu Defeza Timor-Leste, Chand, Departamentu Apoiu Lojístiku ba Universidade Forsa Armada Popular Xina, Xu Qingeng ho Adidu ba Defeza Xina iha Timor-Leste, Koronel Hunang Damin, no médiku espesialista sira husi forsa armada rua, ko’alia no partilla esperiénsia kona-ba oinsá mak halo jestaun atu responde ba kombate COVID-19.

“Esperiénsia sira-ne’e pozitivu tebes ba ita halo nia intervensaun atu bele fó apoiu ba governu atu responde ba luta kontra propagasaun COVID-19  iha Timor-Leste,” hateten Koronél Coliati.

Forsa armada Xina mós introdús esperiénsia prinsipál husi médiku espesialista husi forsa sira nian ne’ebé hala’o tratamentu ba epidemia foun ba pandemia coronavirus iha Xina ne’ebé trata pasiente hamutuk 7000-resin no konsege atinje “zero kazu kontájiu’’.

Husi parte F-FDTL nian partilla kona-ba kondisaun Timor-Leste nian iha situasaun atuál epidemia no serbisu resposta sira.

Adidu Defeza Xina iha Timor-Leste, Koronél Huang Damin, espresa hodi dehan, nia parte agradese ba lider no espesialista relevante sira husi forsa armada rua ba sira-nia partisipasaun ativa.

Nia afirma, sira nia parte sei kontinua fó apoiu no ajuda Timor-Leste no promove di’ak liu tan kooperasaun no amizade entre Forsa Defeza rua ne’e.

Iha loron hirak liu ba mós Ministru Defeza no Komandante Forsa Defeza husi nasaun Xina ho Timor-Leste haruka karta ba malu hodi espresa sira-nia apoiu no solidariedade ba malu.

Governu Xina liu hosi Ministériu Defeza Nasionál mós fó doasaun materiál protesaun no ekipamentu saúde ba Governu Timor-Leste liuhusi Ministériu Defeza ho F-FDTL.

Ekipamentu hirak ne’e sei to’o iha Timor-Leste iha fulan ne’e nia laran no sei ajuda F-FDTL kombate di’ak liu tan hasoru propagasaun surtu COVID-19.

Jornalista : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here