Koordenadór Programa Espozisaun Dubai, Arif Abdullah Sagran. Imajen Tatoli/Egas Cristovão

DILI, 05 juñu 2020 (TATOLI) – Governu Emiradu Árabe Unidu (EAU) deside adia espozisaun, ne’ebé tuir oráriu eventu mundiál ne’e sei realiza iha outubru 2020, maibé deside muda ba loron 1 outubru 2021 to’o 31 marsu 2022 tanba kauza husi pandemia COVID-19.

Maski nune’e, Governu Timor-Leste kontinua hatudu nia kompromisu atu partisipa eventu mundiál ne’e hodi promove-an ba nasaun seluk.

Koordenadór Programa Timor-Leste ba Espozisaun Dubai, Arif Abdullah Sagran, informa enkontru ho Ministru ba Prezidénsia Konsellu Ministru no Ministru Koordenadór Asuntu Ekonómiku interinu, Fidelis Manuel Leite Magalhães, hodi informa desizaun Governu EAU katak sei muda esposizaun mundiál tanba surtu globál ne’ebé afeta ba mundu tomak.

“Ita hatene katak hahú husi 2019 ita hahú prepara no deside ona sei partisipa iha Espozisaun Dubai 2020, maibé situasaun COVID-19, maka adia ba 2021. Ohin ha’u informa ba Ministru Fidelis katak Timor-Leste nafatin halo preparasaun hodi partisipa,” tenik Koordenadór ne’e iha Palásiu Governu, sesta ne’e.

Notísia Relevante: Orsamentu ba Expo Dubai Mantein Millaun $2,1

Timor-Leste Manda ona Lista Produtu ba Expo Dubai

Autoridade Timor-Leste nia ba Espozisaun Dubai, Francisco Kalbuady Lay hakarak mantein partisipasaun iha eventu mundiál ne’e.

Iha área espozisaun, Timor-Leste hetan ona espasu atu halo aprezentasaun sasán iha espozisaun ne’e ho luan metru kuadradu 250, ne’ebé oferese gratuitu no apartementu inklui viza ba ema importante iha Timor-Leste atu partisipa iha Espozisaun Dubai.

“To’o agora Timor-Leste sei mantein posizaun atu partisipa, maibé depende ba Konsellu Ministru nia desizaun. Ami tékniku sira kontinua prepara maski iha atrazu oituan maibé ne’e kauza husi surtu COVID-19,” nia akresenta.

Parte seluk nia konsidera, Governu hakarak partisipa tanba iha ona esperiénsia partisipa iha espozisaun mundiál iha Beijing, Xina no Milan, Itália ho susesu.

Iha Espozisaun Dubai, Timor-Leste sei hetan benefísiu bainhira partisipa hanesan durante fulan-neen espozisaun, kada loron nasaun hotu ne’ebé partisipa sei selebra nia loron nasionál ka independénsia.

“Ita hetan selebrasaun loron nasionál iha Espozisaun Dubai ne’ebé sei partisipa husi Presidente Repúblika ka Primeiru-Ministru,” nia hatutan.

Nune’e mós sei iha atividade fórum konferénsia ba Governu no ba Parlamentu, ne’ebé Membru Governu no Deputadu sira bele partisipa inklui iha espozisaun kulinária ne’ebé sei promove produtu ka ai-han lokál.

“Ita sei promove ita-nia hahan no ita deside ona. Governu Dubai mós aprova ona hanesan ikan saboko, katupa no seluk tan,” nia salienta.

Aleinde ne’e, iha mós espozisaun ba kultura hanesan tais no sei promove Timor-Leste nia riku-soin hanesan fatuk, besi no mina rai, no ikus liu sei promove Kafé Timór.

“Fó mós loron ida ba Timor-Leste atu promove nia kafé liuhosi espozisaun, nune’e bainhira ema mai koko no ekipa sira bele esplika ba ema hotu,” nia akresenta.

Antes ne’e, Governu Timor-Leste deside aloka orsamentu millaun $2,1 hodi partisipa eventu mundiál ne’e.

Área ba espozisaun ne’e kuaze ektare 438 iha Dubai Exhibition Center no sei partisipa husi nasaun 192 inklui Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here