OÉ-CUSSE, 05 juñu 2020 (TATOLI)–Prezidente Autoridade Rejiaun Administrativu Oé-Cusse Ambeno (RAEOA) no Zona Ekonomia Espesiál Sosiál Merkadu Timor-Leste (ZEESM), José Luís Guterres ‘Lugu’, hala’o abertura ba reuniaun ne’ebé organiza hosi diretór rejionál edukasaun ho inter-diretór rejionál sira atu diskute kona-ba preparasaun hodi re-ativa prosesu aprendizajen prezensiál iha RAEOA.

“Papél profesór importante tebes atu kria jerasaun ida diak liu no sai parte hosi membru komunidade ne’ebé sei sai lider nasaun nian. Alende ne’e,  no mós sai autór ba dezenvolvimentu iha futuru, tanba instituisaun eskola sira no profesór funsiona atu orienta no promove potensiál labarik,” dehan Lugu iha sesaun abertura ne’ebé hetan mós prezensa hosi xefia liña inter-rejionál sira iha Otél Fitun Lima, Oe-Upun, Ambeno.

Komunikadu ne’ebé Ajénsia TATOLI asesu hosi média Prezidente Autoridade hateten, Autoridade RAEOA sei koordena ho Ministériu Edukasaun, Juventude no Desportu (MEJD) hodi prepara informasaun detalla kona-ba re-ativa prosesu aprendizajen prezensiál iha territóriu tomak, inklui RAEOA tanba Timor-Leste sei implementa Estadu Emerjénsia ba datoluk liuhusi dekretu prezidente nó 35/2020, loron 27 Maiu.

“Se ita akompaña komunikadu ne’ebé fó sai husi MEJD katak dirijente eskola sira hahú hala’o limpeza jerál, kumpre protokolu hosi Ministériu Saúde liuliu uza máskara, fase-liman no mantein distánsia sosiál, tanba iha RAEOA ita-nia estudante barak. Nune’e autoridade presiza koopera ho entidade hotu atu apoiu no prepara ekipamentu protesaun pesoál, sasán protesaun seluk hodi prevene surtu Coronavirus (COVID-19) tantu estudante no profesór sira,” Lugu subliña iha reuniaun ho diretór inter-rejionál RAEOA.

Prezidente Autoridade apoiu tebes inisiativa hodi re-ativa prosesu aprendizajen prezensiál no husu nafatin manorin na’in sira atu kontrola estudante sira hodi kumpre padraun ne’ebé sei fó sai hosi MEJD no Ministériu Saúde ba prevensaun propagasaun COVID-19.

Tanba, faze   ezekusaun ho tipu  Dotasaun Orsamentu Temporáriu (DOT) Autoridade RAEOA, seidauk bele ezerse funsaun sira ho másimu liu-liu kona-ba planu atu kompleta fasilidade edukasaun, inklui reabilita edifísiu balun hodi atinji objetivu aprendizajen liuhosi hasa’e kualidade prosesu aprendizajen ba labarik sira iha eskola.

“Ha’u hala’o ona enkontru ho Sindikatu Profesór sira iha RAEOA hodi diskute kona-ba problema no dezafiu sira. Ezemplu ida mak Autoridade sei re-ativa fali Inspetór Eskola, ko’alia ho MEDJ hodi aloka transporte motorizada ba inspetór sira hodi hala’o sira-nia knaar ho di’ak, no husu atu MEJD apoiu tan karteira ba eskola sira ne’ebé sei falta. Ita sei esforsu hamutuk hodi rezolve problema ne’e,” Lugu hato’o iha reuniaun ne’e.

Lugu aumenta tan katak, iha tempu badak Autoridade RAEOA sei aloka orsamentu COVID-19 nian hodi estabelese fasilidade bee no saneamentu iha eskola sira.

“Tempu badak ita iha ona Sekretáriu Rejionál Edukasaun atu hala’o funsaun normál hodi aselera prosesu dezenvolvimentu iha setór edukasaun,” nia espressa.

Nia mós esplika kona-ba objetivu hosi enkontru ne’e, hodi hatán ba orientasaun ne’ebé hato’o husi MEJD hodi hala’o preparasaun antes re-ativa prosesu aprendizajen prezensiál iha territóriu tomak  ne’ebé anúnsiu iha loron, 1 Juñu 2020.

Iha sesaun enseramentu, Prezidente Autoridade Lugu, hameno ba manorin sira atu hanorin labarik sira hodi valoriza kultura, sosiál hodi kria estabilidade sosiál iha RAEOA. Nia mós énfaze atu manorin no estudante sira nafatin kumpre protokolu Sentru Integradu Jestaun Krize hodi prevene surtu COVID-19 iha RAEOA.

Iha fatin hanesan, Diretór Edukasaun Rejionál Oé-Cusse Ambeno, Daniel Mauno, hateten reuniaun ne’e hanesan mós medida hodi hametin liña koordenasaun no kontinua hatutan informasaun kona-ba prosesu aprendizajen prezensiál, no mós matéria didátika sira hodi manorin sira prepara didi’ak bainhira ensinu aprendizajen hahú ona iha RAEOA.

“Ha’u hetan ona informasaun hosi MEJD atu dirijente edukasaun hahú prepara didi’ak ba atividade ensinu relasaun ho prosesu aprendizajen prezensiál, no mós matéria didátika sira. Bainhira MEJD autoriza prosesu ensinu aprendizajen, RAEOA prontu ona,”  Daniel Mauno hateten.

Antes ne’e Servisu Edukasaun rejionál hetan ona ekipamentu protesaun pesoál no sasán protesaun sira seluk husi Programa Nasoins Unidas ba Dezenvolvimentu (sigla Inglés-UNDP) hodi distribui ba eskola sira ba prevensaun surtu COVID-19 bainhira prosesu aprendizajen hahú.

Jornalista : Cipriano Colo

Editór      : Cancio Ximenes

 

HAKEREK NO HATÁN

Please enter your comment!
Please enter your name here