Xefe Suku Muapitine, Lívio Mendes. Imajen/Espesiál

DILI, 05 juñu 2020 (TATOLI) – Governu liuhosi Ministériu Solidaridade Sosiál no Inkluzaun (MSSI) lansa ona kalendáriu pagamentu subsídiu ba kada uma-kain $200 ba fulan-rua nian, ne’ebé sei realiza simultaniamente iha munisípiu 12 durante loron-tolu hahú loron 08 to’o 10 juñu, tanba ne’e kada suku hahú ona preparasaun, nune’e mós iha Suku Muapitine.

Xefe Suku Muapitine, Postu Administrativu Lospalos, Munisípiu Lautém, Lívio Mendes, informa autoridade lokál iha suku ne’e prontu atu koopera ho ekipa nasionál hodi fahe subsídiu.

“Ha’u-nia suku ho totál uma-kain hamutuk 558, nia dokumentu hotu preperadu atu simu subsídiu husi Governu Sentrál durante períodu Estadu Emerjénsia relasiona ho luta kombate propagasaun surtu COVID-19,” tenik Líder Komunitáriu ne’e ba Agência Tatoli via telefónika, sesta ne’e.

Suku Muapitine kompostu husi aldeia lima ho totál uma-kain 558 kompostu husi Aldeia Malahara ho uma-kain 130, Vailoro 114, Muapitine 113, Pehefito 126 no Lopuloho 75.

Ho nune’e, Lívio Mendes dehan nu’udar autoridade lokál nia parte iha devér morál no prontu koopera ho ekipa tékniku husi Governu Sentrál atu halo pagamentu ho susesu.

“Agora daudaun ami hein oráriu pagamentu subsídiu tanba orsamentu mós Governu Sentrál sei transfere mai konta bankária suku nian no hein ekipa MSSI no Banku Nasionál Komérisu Timor-Leste (BNCTL, sigla portugés) atu halo pagamentu,” nia akresenta.

Ho nune’e, nia husu ba komunidade bainhira simu ona subsídiu uza ba nesesidade uma-laran, la’ós foti subsídiu ba joga karta ka halo atividade seluk ne’ebé laiha benefísiu.

“Ha’u apela ona ba komunidade katak subsídiu ne’e imi-nia direitu atu hetan, maibé presiza uza ba nesesidade uma-laran ka hanesan hola hahan ruma la’ós ba asuntu seluk ne’ebé laiha benefísiu,” nia apela.

Apoiu monetáriu ba faze dahuluk hamutuk benefisiáriu uma-kain 298.119 iha munsípiu 12 la inklui Rejiaun Administrativa Espesiál Oe-Cusse Ambeno (RAEOA), ne’ebé korresponde ho orsamentu hamutuk $59,623,800, ba pagamentu kada uma-kain hamutuk $200.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here