Lagoa Ira-Lalaro, área Malahara, Suku Muapitene, Postu Administrativu Lospalos, Munisípiu Lautém. Imajen/Espesiál

DILI, 04 juñu 2020 (TATOLI) – Xefe Suku Muapitine, Postu Administrativu Lospalos, Munisípiu Lautém, Lívio Mendes, husu ba Governu atu konserva lafaek sira iha área Lagoa Ira-Lalaro, atu prevene tata-mate no kanek komunidade sira ne’ebé hakarak ba kail ikan.

“Ita-nia Governu tenke hala’o asaun konkretu no sériu hodi konserva lalais lafaek sira iha Lagoa Ira-Lalaro atu komunidade iha Suku Muapitene no suku viziñu sira-nia vida bele, nune’e labele iha tan kazu lafaek tata-mate,” tenik Autoridade Lokál ba Agência Tatoli, via telefónika, kuarta ne’e.

Tuir Lívio Mendes, maski fó sai avizu ba komunidade sira atu kuidadu-an bainhira ba kail ikan iha lagoa ne’e, maibé komunidade kontinua aumenta ba bebeik kada loron.

“Ita labele bandu komunidade atu mai kail ikan tanba ita-nia maluk balun mai kail ikan hodi ba fa’an atu sustenta ekonomia uma-laran no balun mai kail tanba hanesan divertimentu ida,”nia akresenta.

Notísia Relevante: Lafaek Tata Mate Ema Ida iha Lagoa Ira-Lalaro

Ho nune’e, nia dehan solusaun mak Governu tenke konserva Lagoa Ira-Lalaro, maski presiza orsamentu ho kustu boot.

Alternativu seluk mak Governu Sentrál ho lokál tenke deside hamutuk hodi define fatin no halo lutu, nune’e komunidade bele hala’o atividade kail.

“Ha’u halo proposta ona no aprezenta ona ba munisípiu no diretór  sira atubele haree hamutuk asuntu ne’e ho sériu tanba ita-nia komunidade kuaze 27 mak lafaek tata-mate no balun kanek,” nia subliña.

Líder Komunitáriu ne’e orienta ona ba kada Xefe Aldeia sira atu fó avizu ba nia populasaun atu ba kail ikan iha lagoa ne’e karik tenke kuidadu-an, tanba kada loron kuaze komunidade na’in-50-resin mak hala’o atividade kail ikan iha área refere.

Iha loron 23 maiu ne’e, Lafaek tata mate Banifaçio Sanches ho idade 27 bainhira ba kail ikan iha Lagoa Ira-Lalaro, área Malahara, Suku Muapitne.

Lafaek tata matebian lori ba bee klaran to’o loron ida tomak mak komunidade sira hetan fali matebian nia mate-isin.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here