Tribunál Distritál Dili. Imajen/TATOLI

DILI, 04 juñu 2020 (TATOLI) – Tribunál Distritál Dili (TDD), ohin,  absolve arguidu José Pinto, nu’udar membru Polísia Nasionál Timor-Leste (PNTL) iha Komandu Munisípiu Dili, husi krime ofensa integridade fízika simples.

Liuhusi audiénsia julgamentu iha TDD, lezadu António Gonçalves no lezada Serafina Moreira Mendonça, husu tribunál atu dada hikas tiha kazu ne’e tanba sira-nia parte iha relasaun família ho arguidu José Pinto.

Rona tiha deklarasaun lezadu sira-nian ne’e, Juiza singular Maria Modesta, husu ba parte Prokuradór Domingos Barreto ne’ebé reprezenta Ministériu Públiku atu haree tuir prosesu krime ne’ebé iha.

Enkuantu parte Defeza Nelson Borges ne’ebé fó asisténsia legal ba arguidu husu mós ba tribunál atu foti desizaun tuir konviksaun tribunál nian, tanba lezadu no lezada hakarak atu dame malu ho arguidu.

Ho nune’e, tuir entendimentu tribunál nian omóloga hodi absolve no laiha multa ba kazu refere.

Arguidu José Pinto, husu deskulpa ba aktu ne’ebé nia halo, tanba momentu ne’ebé hala’o serbisu iha terrenu ho nervozu, nune’e rezulta insidente refere.

Nia mós deklara ba tribunál no públiku ba oin hanesan membru PNTL sei hala’o funsaun tuir de’it lei no orden no sei la prátika tan aktu hanesan iha futuru.

Antes ne’e, Ministériu Públiku (MP) liuhusi Prokuradór Domingos Barreto, akuza arguidu hanesan autór materiál ho forma konsumada, prátika krime tolu (3) ofensa ba integridade fízika simples iha artigu 145 kódigu penal Timor-Leste ho nia moldura penal bele hetan pena prizaun tinan tolu (3) ka multa.

Tuir faktu ne’ebé arrola husi MP katak, iha loron 19 dezembru 2016, tuku 20:00 Otl, membru Polísia Nasionál Timor-Leste Unidade Task Force ne’ebé lidera husi arguidu José Pinto, fó apoiu seguransa ba serbisu saneamentu orden públika, hodi halo operasaun ba negosiante ambulante ka negosiante roda tolu iha sidade Dili.

Liuhusi operasaun konjunta ne’e, ekipa saneamentu ho polísia Task Force ne’ebé lidera husi arguidu halo duni operasaun ba negosiante ambulante sira iha edifísiu SEFOPE, besik ofisina Stallone, Aldeia 04, Suku Caicoli, Dili.

Altura ne’eba, lezadu António Gonçalves hamriik konversa hela ho ajente polísia ida husi Ainaro, maibé lakleur membru ekipa saneamentu ida hakbesik ba nia atu baku ho kastete ka stike, nune’e mosu diskusaun, hafoin arguidu José Pinto haksoit tun husi karreta, diretamente fó tuku dala-ida iha kanoruk no tebe dala-ida iha kelen halo lezadu monu tun ba rai.

Kuandu lezadu monu iha rai, arguidu ho nia maluk sira kontinua baku lisuk nafatin, hafoin Serafina Moreira Mendonça ho kondisaun gravida, halai mai hakuak António hodi dehan ba polísia katak to’o ona, maibé arguidu José Pinto, la preokupa hodi lori kastete baku dala-ida iha hirus matan karuk no tebe dala-ida iha tilun-hun karuk.

Konsekuénsia direita husi agresaun ne’e fízika ne’e rezulta lezadu sente moras no bubu iha fatin atinjitu, maibé lezadu la simu asisténsia médiku iha ospitál, enkuantu lezada Serafina ba kedas halo tratamentu saúde iha HNGV.

Ho sirkunstánsia hotu-hotu ne’ebé temi iha leten, arguidu halo ho forma konsiente livre no deliberada, aproveita situasaun oportunu fó apoiu seguransa ba serbisu saneamentu hodi halo operasaun ba negosiante ambulante iha dalan ninin, halo agresaun fízika hasoru lezadu sira konforme faktu diskretu nu’udar meiu ida ne’ebé aptu hodi provoka moras no bubu iha isin, maibé arguidu kontinua prátika nafatin no pretende katak hahalok ne’e proibidu no punidu tuir lei penal.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here