Diretor Jeral MSSI, Rui Manuel Gago Exposto

DILI, 04 juñu 2020 (TATOLI)–Diretór Jerál Ministériu Solidaridade Sosiál no Inkluzasaun (MSSI), Rui Manuel Gago Exposto, informa pagamentu subsídiu ba Munisípiu Dili sei hahú iha tersa (09/06/2020) semana oin.

Notísia Relevante: Komunidade 80% Laiha Konta Bankaria, BNCTL Labele Halo Pagamentu Direta

Nia hatutan, Xefe Suku sira kada suku nian sei foti osan iha banku Unidade BNCTL iha Obrigadu Barak Matadoru iha segunda (08/06/2020) semana oin no entrega direta ba ekipa pagamentu mak sei fahe ba benefisiáriu sira iha suku.

“Pagamentu subsídiu ba uma-kain sira ba Munisípiu Dili nian sei hahú iha tersa (09/06/2020) semana oin. Xefe suku sira kada suku nian sei foti osan iha banku Unidade BNCTL iha Obrigadu Barak Matadouro iha segunda (08/06/2020) semana oin. Hafoin ne’e, entrega direta ba ekipa pagamentu mak sei fahe ba benefisiáriu sira iha suku,” dehan Diretór Jerál MSSI, Rui Manuel Gago Exposto, ba Ajénsia TATOLI iha nia knaar fatin, Caicoli, Dili, kinta ne’e.

Xefe suku sita atu foti osan iha BNCT, nia informa, Postu Administrativu Dom Aleixo, Vera Kruz, Cristo Rei no Na’in Feto sei konsentra foti osan iha Unidade BNCTL iha Obrigadu Barak Matadoru nian, no Postu Metinaro no Ataúro sei foti osan iha nia administrasaun rasik hafoin halo pagamentu.

“Munisípiu Dili nian halo pagamentu iha loron ida de’it. Loron 8 juñu foti no 9 juñu fahe ona ba benefisiáriu sira iha suku,” Rui Manuel Gago Exposto hateten.

Prosesu pagamentu subsídiu ba agregadu familiár ne’e sei hetan seguransa másimu hosi protesaun sivíl inklui Polisia Nasionál Timor Leste (PNTL).

Dadus uma-kain ne’ebé MSSI relata mak hamutuk 318,151 benefisiária no totál orsamentu ne’ebé atu selu benefisiáriu hamutuk 6363.200.00 inklui ho Rejiaun Administrativu Espesiál Oé-Cusse Ambeno (RAEOA).

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here