Primeiru-Ministru, Taur Matan Ruak. Imajen /Egas Cristovão

DILI, 04 juñu 2020 (TATOLI)–Primeiru-Ministru (PM), Taur Matan Ruak, sei aprezenta lista membru Governu foun atu kompleta VIII Governu Konstitusionál iha tempu badak.

“Ne’e seidauk. Espera katak iha tempu badak sei aprezenta lista membru Governu foun atu kompleta VIII Governu Konstitusionál,” dehan Xefe Governu, Taur Matan Ruak, ba jornalista sira hafoin hala’o enkontru semanál ho Prezidente Repúblika, Francisco Guterres “Lú Olo”, iha Palásiu Prezidente Nicolau Lobato, Bairru Pité, Dili, kinta ne’e.

Antes ne’e, iha loron 13 fulan maiu 2020, Primeiru-Ministru  Taur Matan Ruak, aprezenta ba Konsellu Ministru (KM) projetu dekretu-lei ba alterasaun dahuluk dekretu-lei númeru 14/2018 17 agostu, kona-ba orgánika VIII Governu Konstitusionál.

Altersaun ne’e, prevee ezisténsia Vise-Primeiru-Ministru na’in-rua hodi fó apoiu ba Xefe Governu iha ninia knaar, ida, ba asuntu sosiál no ida seluk haree ba ordenamentu no planeamentu.

Alterasaun orgánika ne’e mós hasai Ministru Reforma Lezislativa no Asuntu Parlamentár no Ministru Planeamentu no Investimentu Estratéjiku, la prevee tan ezisténsia Ministru Estadu maibé prevee fali ministru ida ba asuntu Parlametár no Komunikasaun Sosiál, Ministru ba Planu Ordenamentu Territóriu,  Vise Ministru ida ba Turizmu, Kultura, no Komunitáriu, Vise Ministru ida ba komérsiu no indústira no vise Ministru interiór ida.

Nune’e, iha loron 29 fulan maiu tinan ne’e, Prezidente Repúblika Francisco Guterres “Lú Olo”  fó posse ba membru foun VIII Governu nian na’in-ualu (8) hodi okupa kargu Vise-Primeiru-Ministru Armanda Berta dos Santos, Ministru ba Prezidénsia Konsellu Ministru Fidelis Manuel Leite Magalhāes, Ministru ba Assuntu Parlamentares no Komunikasaun Sosiál, Francisco Martins da Costa Perreira Jerónimo, Ministru Finansas Fernando Hanjam, Ministru Administrasaun Estatal Miguel Pereira de Carvalho, Ministra Saúde Odete Maria Freitas Belo, Ministru ba Assuntu Kombatentes Libertasaun Nasionál Júlio Sarmento da Costa ‘Meta Mali’ no Ministru Agrikultura no Peskas Pedro dos Reis.

Aleinde ne’e, iha orgánika Governu ne’e hateten Ministru sira ne’ebé sei integra ba VIII Governu Konstitusionál mak hanesan: Ministru da Prezidénsia Konsellu Ministru, Ministru Koordenadór ba Assuntu Ekonómiku, Ministru ba Assuntu Parlamentar no Komunikasaun Sosial, Ministru Finansas, Ministru Negósiu Estranjeiru no Kooperasaun, Ministru Justisa, Ministru da Administrasaun Estatal, Ministru Saúde, Ministru Edukasaun Juventude no Desportu, Ministru Ensinu Superior, Siénsia no Kultura, Ministru Solidariedade Sosial no Inkluzasaun, Ministru ba Assuntus Kombatentes Libertasaun Nasionál, Ministru Planu no Ordenamentu, Ministru Obras Públikas, Ministru ba Transportes no Komunikasaun, Ministru Turismu, Komérsiu no Industria, Ministru Agrikultura no Peskas, Ministru Defeza, Ministru Interior, Ministru Petróleu no Minerais.

Ministru sira sei koajuva husi Vise-Ministru Negosius Estranjeirus no Kooperasaun, Vise-Ministru Justisa, Vise-Ministru Estatal, Vise-Ministru ba Kuidadu Saúde Primária, Vise-Ministru ba Dezenvolvimentu Estratéjiku Saúde, Vise-Ministru Edukasaun, Juventude no Desportu, Vise-Ministru Solidariedade Sosial, Vise-Ministru Obras Públikas, Vise-Ministru ba Turismu Komunitária no Kultural, Vise-Ministru Komérsiu no Indústria, Vise-Ministru Interior, Sekretáriu Estadu Kooperativa, Sekretáriu Estadu ba Ambiente, Sekretáriu Estadu ba Komunikasaun Sosiál, Sekretáriu Estadu ba Teras no Propriedades, Sekretáriu Estadu ba Juventude no Desportu, Sekretáriu Estadu Arte no Kultura, Sekretáriu Estadu ba Assuntus Kombatentes Libertasaun Nasionál, Sekretáriu Estadu ba Peskas, Sekretáriu Estadu ba Protesaun Sivíl no Sekretáriu Estadu ba Igualdade no Inkluzaun.

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here