DILI, 04 juñu 2020 (TATOLI) – Durante janeiru to’o maiu, tinan ne’e, prizioneiru na’in-62 mak hetan liberdade kondisionál iha Estabelesimentu Prizaun Becora, Dili.
Diretór Estabelesimentu Prizaun Becora, João Domingos relata, husi númeru ne’e kondenadu ne’ebé liberdade kondisionál na’in-41, na’in-ida (1) mate no liberdade husi prizaun preventiva na’in-20.
Kondenadu hirak ne’e komete kazu hanesan violasaun sexual, omisídiu, violénsia doméstika, ofensa integridade fíziku no krime droga.
“Liberdade kondisionál katak prizioneiru sira ne’ebé hetan liberdade husi Tribunál bazeia pedidu husi autoridade Prizaun sira, tan sira hala’o ona pena sorin balun no liuhusi avaliasaun hatudu disiplina katak iha ona arrependimentu no prontu ona no re-integra fila fali ba sosiedade sira,” esplika Diretór Prizaun Becora, João Domingos ba Ajénsia Tatoli, ohin, liuhusi mensajen WhatsApp.
Nia esplika, atu fó liberdade kondisionál ne’e kompeténsia Tribunál nian hafoin husu paresér ba Ministériu Públiku no tribunal deside.
João Domingos mós informa, iha janeiru to’o maiu, prizioneiru foun hamutuk na’in-88 maka tama tan prizaun mi husi area jurizdisaun Tribunál Distritál Dili, Baucau, Suai ho Oe-Cusse.
Total númeru prizioneiru daudaun ne’e iha estabelesimentu prizaun Becora iha na’in-591, kompostu husi prizaun kondenadu na’in-456 no prizaun preventiva na’in-135.
Husi totál ne’e iha mós sidadaun estranjeiru hanesan indonézia na’in-ualu (8), Filipina na’in-lima (5), Austrália nian na’in-ida (1), Xineza na’in-ida (1) no restu timoroan.
Jornalista : Nelson de Sousa
Editór : Francisco Simões
