Komandante Jerál PNTL, Komisáriu Faustino da Costa. Imajen/António Gonçalves

DILI, 04 juñu 2020 (TATOLI)–Komandu Jerál Polísia Nasional Timor-Leste (PNTL) liuhosi Komandante-Jerál, Komisáriu Faustino da Costa, deklara instituisaun seguransa ne’e prontu atu asegura prosesu pagamentu subsídiu ba komunidade iha territóriu tomak.

Prontidaun ne’e, Faustino aprezenta ba Prezidente Repúblika, Francisco Guterres “Lú Olo”, durante enkontru semanál ne’ebé hala’o iha Palásiu Prezidente Bairrupité, Dili.

“Ami aprezenta ona ba Prezidente Repúblika katak PNTL halo ona koordenasaun liuhosi enkontru ho instituisaun relevante sira, nune’e PNTL prontu atu asegura prosesu pagamentu subsídiu ba komunidade, durante loron hirak nia laran,” dehan Faustino da Costa ba jornalista sira, kinta ne’e.

Antes ne’e, Vise-Primeira Ministra (VPM) no Ministra Solidaridade Sosiál no Inkluzaun (MSSI), Armanda Berta dos Santos, hateten  Governu Timor-Leste liuhosi Ministériu Solidariedade Sosiál no Inkluzaun apoiu monetáriu ho montante $59,623,800,00  ne’ebé sei benefísia uma-kain hamutuk 298.119 iha Munisípiu 12, la inklui Rejiaun Administrativa Espesiál Oé-Cusse Ambeno (RAEOA).

Objetivu hosi apoiu monetáriu ne’e hodi sustenta família sira no apoiu lakuna despezas tanba situasaun COVID-19 ho  kalendáriu ba prosesu pagamentu sei hala’o uluk iha munisípiu 12, hahú iha tersa, loron-09 juñu 2020, sei realiza iha suku tuir oráriu pagamentu ne’ebé iha.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here