Ministra Saúde foun, Odete Maria Freitas Belo. Imajen /Egas Cristovão

DILI, 04 juñu 2020 (TATOLI)–Ministra Saùde, Odete Maria Freitas Belo, hatete fleksibilidade iha Estadu Emerjénsia datoluk ne’e la’ós fasil hanesan faze dahuluk no daruak nian, tanba ne’e presiza tau atensaun nafatin hodi asegura moras COVID-19 ne’e labele hada’et ba povu Timor-Leste.

“Ita labele hanoin Estadu Emerjénsia datoluk ne’e hanesan fleksibilidade maibé dalaruma hosi ne’e mak hamosu problema boot hodi hada’et moras COVID-19 ne’e ba ita,” dehan Odete Maria Freitas Belo bainhira lidera enkontru koordenasaun ho Koordenadór sira hosi Sentru Integradu Jestaun Krize (CIGC,sigla portugés) iha Sentru Konvensaun Dili (CCD), Merkadu Lama, Dili, kinta ne’e.

OMinistra Saúde foun, Odete Maria Freitas Belo Hamutuk Brigadeiru Jenerál João Miranda “Aluc Descartes Sorumutuk ho Ekipa Gabinete Jestaun Krize hodi Koordenasaun Servisu Kona-ba Situasaun Covid-19 no Kompras Aimoruk. iha Sentru Konvensaun Dili, (04/06).Imajen /Egas Cristovão

Governante ne’e hatutan, faze datoluk ne’e ba semana tolu de’it entaun faze tuir mai tan ne’e sai pergunta boot ba Ministériu Saúde. Tanba, nia dehan, presiza hetane komunidade la’o tuir ona protokolu kona-ba medida preventiva hosi Ministériu Saúde nian ne’e la’o oinsá.

Maski kazu COVID-19 laiha ona, nia dehan,  maibé kazu COVID-19 ne’e iha Timor-Leste nia viziñu (NTT-Indonézia) iha hela. Tanba ne’e, nia husu ba ema hotu-hotu tenke tau atensaun ba asunte refere.

“Ami hosi Ministériu Saúde ne’e haree faze datoluk ne’e importante tebes. Tanba dalaruma hosi fleksibilidade ne’e mak bele hamosu moras,” nia hateten.

Tuir nia, Ministériu Edukasaun Joventude no Desportu (MEJD) mós dehan atu loke fali eskola entaun oinsá preparasaun hosi eskola nian ba estudante sira, igreja no atividade merkadória iha ámbitu pandemia COVID-19 ne’e.

“Tanba ne’e, ita-nia preparasaun tenke forte tanba ita tama ona ba faze datoluk ona ka Estadu Emerjénsia ba datoluk ona ne’e, labele hanoin dehan moras COVID-19 ne’e laiha ona. Maibé, faze datoluk mak fó liu atensaun ba ita tanba ita-nia oan sira atu eskola ne’e, presiza eskola nia kontrolu ba sira katak sira uza máskara, fase liman no halo distánsia fíziku no sosiál,” governante ne’e hateten.

Tuir loloos, nia esplika, MS iha planu atu mai vizita
Sentru Intergradu Jestaun Krize (CIJC. sigla portugés) maibé enfelizmente husi CIJC fó konvite ona ba MS, ohin, bele rona aprezentasaun no lala’ok servisu iha CIJC ne’e.

“Ministériu Saúde nia prezensa iha CIJC ne’e atu hatene no koñese sé-sé mak servisu, halo servisu saida no oinsá nia prosesu kontinua no mós oinsá preparasaun no oinsá sira-nia servisu hodi apoiu ba Ministériu Saúde to’o iha ne’ebé. Ho aprezentasaun hirak ne’e, ha’u kompriensivu tebes,” nia dehan.

Parte seluk, nia hateten, nia parte mós halo avaliasaun ba servisu ba iha pilares ualu (8) liuliu pilares ualu (8) ne’ebé iha MS nia okos, kona-ba liña koordenasaun entre ministeriais iha CIJC.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here