Logo Ministériu Saúde.

DILI, 04 juñu 2020 (TATOLI)-Ministériu Saúde hamutuk ho Parseiru Dezenvolvimentu sira iha kinta ne’e, lansa ona telefone hotline ho númeru 212123 hodi atende pasiente ho problema saúde mentál no psikolójiku tanba impaktu husi problema surtu COVID-19 iha Timor-Leste.

Ministériu Saúde lansa programa ne’e tanba estabelese kooperasaun servisu ho parseiru internasionál Sira hanesan UNICEF, Embaixada Japaun, no mós Kompañia telekomunikasaun Timor Telekom, Telemor,Telcomsel no ONG Catalpa.

Governu Japaun maka apoiu osan rihun $ 24 liuhosi UNICEF hodi implementa programa ne’ebé ho alvu ba ema moras mentál iha territóriu Timor-Leste.

”Ita estabelese tan hotline 212123 ida ne’e ita liga liu ba ema ne’ebé mak moras mentál no psikolójiku relasaun ho COVID-19. Ida ne’e fatores importante ne’ebé mak liga liu ba ema ida ne’ebé mak moras mentál ne’e rasik,” dehan, Diretóra Jerál Prestasaun Saúde, Odete Viegas da Silva durante ninia diskursu iha serimonia lansamentu ne’ebé hala’o iha salaun SPK Lahane, Dili.

Diretóra ne’e hatutan, lansamentu programa ida ohin hodi reforsa liután atendimentu ba públiku ne’ebé iha ligasaun ho coronavirus tanba antes ne’e Ministériu liuhosi Sentru Integradu Jestaun Krize (CIGC) mós lansa ona liña hotline 119.

”Ita hotu haree katak iha komputadór iha neen bele fasilita liña rua husi Timor Telekom ho liña rua husi Telemor no liña rua husi Telecomsel tanba ne’e mak ohin ha’u husu katak liña neen ne’e bele funsiona hotu para ema telefone ita atende,” tenik Odete.

Diretóra Jerál Prestasaun Saúde ne’e, hodi Governu konstitusionál daualu nia naran agradese ba kontribuisaun husi Parseiru Dezenvolvimentu Internasionál, Nasionál, ONG no mós Departementu Moras la Hada’et Ministériu Saúde hodi estabelese tan programa ne’e.

Iha fatin hanesan Reprezentante UNICEF iha Timor-Leste, Valérie Taton, deklara UNICEF ho Embaixada Japaun nia apoiu hodi estabelese hotline dahuluk ba ema ho problema mentál.

“Moras saúde mentál mak importante hanesan mós saúde fizíku ba sira-nia moris di’ak efeitu husi pandemia coronavirus ne’ebe mak mundu tomak enfrenta,”katak Valérie.

Reprezentante Organizasaun Internasionál ne’e sujere atu Governu fó mós atensaun ba populasaun ho problema mentál.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here