Ministru Defeza no Ministru Interiór interinu, Filomeno da Paixão de Jesus. Imajen/António Gonçalves

DILI, 04 juñu 2020 (TATOLI) – Ministru Defeza no Ministru Interiór Interinu, Filomeno da Paixão de Jesus, simu ona proposta husi Komandu Polísia Nasionál Timor-Leste (PNTL) kona-ba  demisaun  membru na’in- ualu (8).

Notísia Relevante : Komandu PNTL Demite Membru Na’in-Ualu

Ministru Filomeno Paixão hateten, nia-parte triste tebes, kazu indixiplinadu barak akontese iha Instituisaun PNTL, maibé Komandu jerál liuhusi Departamentu Justisa PNTL durante ne’e fraku tebes no talvés ta’uk atu foti desizaun hodi demite membru sira ne’ebé komete iha kazu krime grave, inklui kazu abandona serbisu no la kumpre regra PNTL nian.

“Ida ne’e komplikadu tebes, ha’u haree prosesu ne’e ha’u hafodak, prosesu sira-ne’e balun iha 2011, 2012, 2013, 2014 no balun 2017. Prosesu durante tinan hirak ne’e balun atu too tan tinan 10 la prosesa,” hateten Filomeno da Paixão ba jornalista sira, ohin, iha Ministériu Defeza, Fatuhada, Dili.

Iha Komandu PNTL, tuir Ministru Filomeno, fraku liu maka Departamentu Justisa. Nia dehan, imajina kazu falta de’it la prosesa too agora.

“Ida-ne’e kria oportunidade para ema falta nafatin, tanba ita nota iha polísia nian, ema falta la prosesa,” dehan Ministru Filomeno.

Ministru Filomeno lamenta Ofisiál Instrutór sira ne’ebé lidera Departamentu Justisa hala’o sira-nia knaar too mandatu remata, maibé ema sira nunka brani foti desizaun ruma hasoru sira membru polisia sira ne’ebé komete kazu krime sira.

“Ha’u foin haka’as sira maka prosesu sira ne’e foin la’o, selae sira haluha prosesa kazu sira-ne’e too haluha,” afirma Filomeno da Paixão.

“Ha’u bolu atensaun ba komandante polisia tenke serbisu sériu, selae Timór ne’e envezde ita mak kontrola sira, maibé bandidu sira maka kontrola fali ita, hanesan kazu Kulu-hun, kazu Maubara, agora foin lori mai ha’u nia meja foin atu pecat, sekuandu la pecat, sira hela iha komarka  han-hemu toba simu tan osan, mezmu sira oho tan ema, entaun fó brani ba sira seluk tiru tan, ne’e maka ida kazu Maubara mós tiru tan, ida ne’e ha’u triste tebes ho Komandu PNTL la iha asaun komandu,” dehan Ministru Filomeno ho hirus.

Ministru mós lamenta, tanba problema komandante sira ta’uk no la brani foti desizaun, ikus mai membru sira halo atitude lori arma tiru arbiru hanesan kazu ne’ebé mosu iha Maubara nian.

 Revee Lei Orgánika no Estatutu PNTL Komplikadu

Iha parte seluk, Ministru dehan, prosesu atu revee lei orgánika no kria Estatutu PNTL too agora sei komplikadu, tanba prosesu ne’e presiza tempu hodi halo analiza kle’an foin aprezenta ba Konsellu Ministru.

Ministru bolu atensaun ba Komandu PNTL inklui asesór sira bainhira halo lei orgánika PNTL no Estatutu PNTL presiza diskute no halo ninia lei ho kritériu sira ho didi’ak no labele tau fali kritériu atu Komandu PNTL mak tenke domina fali iha polítika, tanba bainhira Komandu PNT mak komandu fali polítika bele hamosu dezastre iha futuru.

“Kuidadu!, labele komanda polítika, forsa tenke  iha polítika nia okos, ha’u bolu atensaun ba komandante sira atu haree,” nia alerta.

Dezde Instituisaun PNTL harii iha 2002, too  loron 18 fevereiru 2009 maka Governu hasai hikas lei orgánika PNTL nian ida ne’ebé uza too tinan 2016 foin Komandu PNTL harii ekipa envolve governu hodi prepara estatutu foun PNTL inklui lei orgánika PNTL no revee regulamentu disiplinár ne’ebé aumenta artigu balun hodi fó kompeténsia ba Departamentu Justisa atu uza regulamentu foin sira sai “nehan’ kro’at ida ba Departamentu Justisa hala’o knaar  buka prosesa kazu sira ne’ebé iha relasaun ho justisa no kestaun disiplinár sira tenke prosesa tuir norma sira konstituisaun nian, lei no diretiva sira ne’ebé vigora iha RDTL.

Jornalista :  Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here