Ekipa husi Ministeriu Saude fahe informasaun ba profesores sira iha Eskola Esternato Sao Jose konaba prevensaun COVID-19 antes atu reativa aprendisasen preescolar nian.Imajen/Antonio Goncalves

DILI, 04 juñu 2020 (TATOLI)-Ekipa tékniku husi Ministériu Saúde h o Ministériu Edukasaun Juventude no Desportu (SEJD), kinta ne’e hahú observa kondisaun husi eskola públiku no privada sira kona-ba instalasaun tanki fase liman no seluktan hodi prevene transmisaun COVID-19 bainhira Governu re-ativa prosesu aprendijazen ba estudante sira.

Vizita servisu ne’ebé maka ekipa husi MS ho MEJD halo ne’e ba Eskola 30 de Agosto Comoro, Eskola Ensinu báziku Filiál númeru 5 de Maiu Comoro no Eskola Privada Externato São José Ai-mutin.

Koordenadór Prevensaun COVID-19 husi MEJD, Belchior Barros, hateten presiza haree diretamente kondisaun eskola sira antes Governu hasai desizaun hodi re-ativa filafali eskola sira.

“Ami presiza identifika sira iha ona tanki bee no sabaun atu fase liman ka lae, sala de aula ida antes ne’e akumula estudante na’in hira, presiza fahe grupu ka lae, depois oinsá atu garante distansiamentu fizíku no sosiál,” dehan Belchior ba jornaslista iha EBS 30 de Agostu Comoro.

Durante halo observasaun iha terrenu, sira-nia parte identifika husi eskola EBS 30 de Agosto no 5 de Maiu Comoro seidauk iha tanki bee moos ba profesór no estudante sira hodi fase liman.

Tanba ne’e, Nia sujere ba eskola rua ne’e atu kria  kondisaun hodi kompleta ona ekipamentu prevensaun COVID-19.

Hatan ba pedidu ne’e, Diretór EBC 30 de Agosto Comoro, Filomeno Salsinha, informa nia parte uza ona osan konsensaun eskolár hodi sosa ekipamentu prevensaun COVID-19 hanesan balde, torneira hamutuk neen, aisar 12, sabaun no seluk tan. No planu eskola ne’e sei monta tanki profile rua.

Kona-ba distansiamentu sosiál eskola ne’e sei buka jere alunu sira kada sala tuir pedidu husi Ministériu Saúde ba kombate transmisaun coronavirus.

Eskola ne’e ho sala hamutuk 36, ho totál estudante iha eskola ne’e pruvolta 2.134, durante ne’e kada sala akumula alunu 60.

“Atu kumpre distansiamentu sosiál no fiziku, eskola ne’e sei fahe estudante iha aula ida ba turma tolu, kada turma sei hetan de’it estudante 20 hodi nune’e bele prevene COVID-19 iha eskola ne’e,”dehan Nia.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here