Ministra Edukasaun, Juventude no Desportu Dulce de Jesus Soares. Imajen/TATOLI

AINARO, 03 juñu 2020 (TATOLI)-Ministru Edukasaun Juventude no Desportu (MEJD), Dulce de Jesus Soares, hateten tuir relatóriu husi Servisu Edukasaun Munisípiu Ainaro, rejista kuaze eskola públika hamutuk 60 maka ninia estudante sira asesu ona programa eskola ba uma no estuda online durante fulan marsu to’o maiu, bainhira Governu implementa Estadu Emerjénsia relasaun ho propagasaun COVID-19.

Governu liuhosi Ministériu Edukasaun Juventude no Desportu hamutuk ho parseiru dezenvolvimentu  hanesan UNICEF implementa ona programa eskola ba uma ne’ebé fó sai liuhosi kanál Radíu Televizaun Timor-Leste, Empreza Públika (RTTL,ep), GMN TV, TVE no programa online iha website Ministériu Edukasaun.

Ministra Edukasaun Juventude no Desportu, Dulce de Jesus Soares, hato’o relatóriu ne’e durante vizita servisu iha Munisípiu Ainaro no Aileu iha kuarta (03/06).

“Ha’u husu ba Diretór Edukasaun Munisípiu Ainaro kona-ba eskola hira mak ativu iha programa online  no eskola ba uma,  nia dehan mai ha’u husi eskola 85 ne’e kuaze eskola 60-resin mak asesu ba programa ne’e, entaun ha’u dehan buat di’ak no susesu ida ba ita,” informa Governante ne’e iha Eskola Ensinu Báziku Sentrál terseiru siklu, Venancio Ferraz Ainaro.

Maski nune’e, nia rekoñese durante implementasaun programa ne’e sei enfrenta mós problema tékniku, tanba ne’e Diretór, Adjunto no koordenadór eskola sira labele uza situasaun ne’e hodi politiza fali Programa Governu ne’e ba interese pesoál.

“Ha’u la konkorda tanba dirijente eskola no públiku sira kuandu haree programa ne’e  failansu iha de’it parte negativu, maibé la haree ba parte pozitivu fulan-rua labarik sira hela iha uma ne’e saida mak bele ajuda sira,”Dulce kestiona.

Ikusliu Ministra ba área edukasaun ne’e husu ba Servisu Edukasaun Munisípiu, Diretór Munisipál, Koordenadór eskola idaidak atu servisu hamutuk hodi halo preprasaun ba planu Governu atu re-ativa prosesu aprendijazen ba estudante sira iha tempu badak.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here