Ofisiál Sistema Garantia Kréditu BCTL, Atanásio Amaro Pereira. Imajen Tatoli/António Gusmão

DILI, 04 juñu 2020 (TATOLI) – Konsellu Ministru aprova ona Projetu Dekretu-Lei ne’ebé aprezenta hosi Ministru Koordenadór Asuntu Ekonómiku interinu, Fidelis Manuel Leite Magalhães, hamutuk ho Governadór Banku Sentrál Timor-Leste (BCTL, sigla portugés) Abraão de Vasconselos, kona-ba alterasaun dahuluk ba Dekretu-Lei númeru 23/2017, 12 jullu, Sistema Garantia Kréditu.

Ofisiál Sistema Garantia Kréditu BCTL, Atanásio Amaro Pereira, informa alterasaun ne’e iha mudansa kona-ba definisaun ba empreza ki’ik no média ne’e rasik, ida uluk foku de’it ba empreza ki’ik no médiu, maibé iha alterasaun ne’e inkui tan mikro finanseiru.

“Signifika ba hirak ne’ebé maka emprega ema na’in-ida to’o na’in-lima, ne’e kategoriza hanesan mikro. Alterasaun ne’e sei iha vantajen boot tanba fó espasu atu empreza sira ho kategoria mikro bele asesu, katak vantajen iha futuru ne’e sei fó postu servisu barak liután no benefisia ba ekonomia rai-laran,” relata Atanásio Amaro ba Agênsia Tatoli, iha ninia kna’ar fatin, BCTL, Akait, kinta ne’e.

Nia esplika liután, antes halo alterasaun ne’e, Banku Nasionál Komérsiu Timor-Leste (BNCTL, sigla portugés) de’it maka bele integra iha sistema ne’e maibé bainhira implementa alteresaun foun ne’e, mikro empreza hanesan Kaibauk Investimentu, Moris Rasik no seluk tan bele ona integra iha sistema ne’e.

Maski iha ona alterasaun maibé daudaun ne’e Sistema Garantia Kréditu sei mantein regulamentu anteriór tinan-2019, tanba alterasaun ba Dekretu-Lei ne’ebé hetan ona aprovasaun iha Konsellu Ministru seidauk promulga.

“Banku Sentrál sei mantein nafatin ho Dekretu-Lei no regulamentu anteriór, maske Governu halo ona alterasaun ba diploma ne’e bazeia ba proposta BCTL nian. Maibé to’o agora Banku Sentrál seidauk simu resposta formál husi Governu katak proposta alterasaun ne’e lori ona ba Prezidente Repúblika hodi hetan promulgasaun, tanba ne’e maka seidauk iha mudansa”, Atanásio realsa.

Nune’e, nia espera katak hafoin pandemia COVID-19 no alterasaun ne’e iha futuru empreza sira bele asesu ba sistema ne’e.

Programa Sistema Garantia Kréditu atu promove empreza ki’ik no média iha Timor-Leste hodi fasilita sira asesu finanseira.

Iha programa ne’e, risku kréditu iha empréstimu ba empreza ki’ik no média sei fahe entre fó empréstimu no Sistema Garantia.

Iha faze inísiu, programa garantia kréditu sei fó benefísiu ba empreza ki’ik no média, ho rejistu empregadu husi 6 to’o 50, na’in ema timor-oan, ne’ebé opera iha área agrikultura, turizmu, indústria manufatureira no transporte.

Aleinde ne’e, kréditu ba projetu ekonomia viável ne’ebé prienxe ba Sistema Garantia Kréditu no empreza ne’ebé interese hodi kandidata-an ba sistema ne’e bele kontaktu Banku Sentrál no fó pedidu ba empréstimu.

Prosesu atu asesu ba sistema ne’e, kliente hatama proposta no BNCTL halo avaliasaun no analiza hodi haree katak proposta ne’e merese atu asesu ba eskema ne’e, nune’e Banku Komérsiu haruka ba Banku Sentrál.

BNCTL daudaun ne’e finansia ona empreza rua hosi Lautém iha área turizmu nian liuhosi eskema.

Proposta rua ne’ebé asesu ona eskema ne’e iha novembru 2019, kada proposta hetan $10.000 no daudaun hala’o ona sira-nia atividade negósiu.

Eskema Garantia Kréditu aprova husi VI Governu Konstitusionál no prevee millaun $4 liuhosi Orsamentu Jerál Estadu (OJE) 2017.

Nune’e iha jullu 2019, Banku Sentrál lansa ona sistema refere ba empreza ki’ik no média no prontu ona atu simu pedidu kandidatu ba kréditu ne’e.

Programa ne’e jere husi BCTL no implementa husi instituisaun kréditu iha Timor-Leste no daudaun ne’e BNCTL partisipa hanesan kredór (fó kréditu).

Jornalista: Antónia Gusmão

Editora: Julia Chatarina

1 KOMENTÁRIU

  1. Oinsa kriteria nebe maka ami bee prienche hodi asessu ba kredito? Formatu proposta ami bele hetan husi banku no iha fatin nebe?

HAKEREK NO HATÁN

Please enter your comment!
Please enter your name here