Ofisiál Sistema Garantia Kréditu BCTL, Atanásio Amaro Pereira. Imajen Tatoli/António Gusmão

DILI, 04 juñu 2020 (TATOLI) – Maski Banku Sentrál Timor-Leste (BCTL, sigla portugés) lansa ona Eskema Garantia Kréditu iha jullu 2019, maibé to’o oras ne’e seidauk hetan kliente barak, tanba ne’e Banku Sentrál sempre hakarak hadi’a sistema ho esperansa iha empreza barak mak bele asesu ba kréditu liuhosi sistema ne’e.

Hahú lansamentu to’o oras ne’e BCTL foin simu proposta rua ne’ebé hakarak investe iha área turizmu, ba restaurante no otél.

“Bainhira hahú lansa iha tinan kotuk, Banku Sentrál simu ona aplikasaun rua husi Banku Nasionál Komérsiu Timor-Leste (BNCTL, sigla portugés). Espera katak iha futuru Banku Komérsiu bele halo esforsu maka’as nune’e bele BCTL bele simu proposta barak liután,” hateten Ofisiál Eskema Garantia Kréditu BCTL, Atanásio Amaro Pereira ba Agência Tatoli iha nia kna’ar fatin, Akait, kinta ne’e.

Notísia Relevante: BNCTL Finansia Empreza Rua Liuhusi Eskema Garantia Kréditu

Tanba ne’e, iha loron 29 abríl, Konsellu Ministru aprova Projetu Dekretu-Lei ne’ebé aprezenta husi Ministru Koordenadór Asuntu Ekonómiku interinu, Fidelis Manuel Leite Magalhães, hamutuk ho Governadór BCTL, Abraão de Vasconselos, kona-ba alterasaun dahuluk ba Dekretu-Lei númeru 23/2017, 12 jullu, Sistema Garantia Kréditu.

Intensaun ba alterasaun ida-ne’e, hodi bele alastra liután asesu Eskema Garantia kréditu ba mikro-empreza sira atu hasa’e tipu atividade ekonómika sira ne’ebé tenke elejível ba programa ne’e rasik.

Tuir Ofisiál ba eskema ne’e, nota katak empreza barak maka seidauk komprende kona-ba sistema ne’e no tauk atu foti risku.

“Ami simu aplikasaun rua de’it, ami lahatene ninia problema iha ne’ebé? Banku mak hetan difikuldade iha sosializasaun ba empreza sira ka bele mós husi empreza sira mak sente hanesan lori risku ba sira,” nia akresenta.

Maski nune’e, nia dehan parte banku rasik presiza halo esforsu atu buka kliente hodi bele asesu ba fasilidade refere tanba empreza sira ladún informadu kona-ba sistema ne’e.

“Bele mós husi kliente mak seidauk komprende di’ak liu ba funsionamentu husi Eskema Garantia Kréditu ne’e ka rekezitu balun husi sistema ne’e rasik sei sai hanesan dezafíu boot ba sira atu aplika,” Atanásio realsa.

Desde programa ida ne’e estabelese, BCTL nu’udar instituisaun ne’ebé jere sistema ne’e realiza ona atividade sira hanesan halo sensibilizasaun ba komunidade no empreza sira relasiona ho mekanizmu no kritéria hodi asesu ba sistema refere, nune’e mós Banku Sentrál realiza ona formasaun ba funsionáriu BNCTL nu’udar kreditór.

Tuir Ofisiál programa ne’e, proposta rua ne’ebé hetan ona kobertura husi Eskema Garantia Kréditu, maihusi empreza Lakumore Unipesoál Lda, ne’ebé mak lokaliza iha Petileti, Munisípiu Lautém.

“Sira-nia atividade maka amenta kuartu otél nian. Empreza ida de’it maibé asesu ba tipu rua. Tipu ida kona-ba kréditu Asset Acquisition ka investimentu ho montante $24.500 ne’ebé mak BNCTL dezembolsu ba empreza refere ho porsentu 50, ho nune’e Sistema Garantia Kréditu garantia $12.250 hodi korresponde ba porsentu 50 ne’e.

To’o oras ne’e Banku Sentrál sei halo monitorizasaun ba atividade negósiu empreza ne’e.

Programa Sistema Garantia Kréditu ne’e atu promove empreza ki’ik no média iha Timor-Leste hodi fasilita hodi hetan asesu finanseira.

Iha programa ne’e, risku empréstimu ba empreza ki’ik no média sei fahe entre fó empréstimu no Sistema Garantia.

Aleinde ne’e, asesu kréditu ba projetu ekonomia viável ne’ebé prienxe ba rekezitu Sistema Garantia Kréditu.

Eskema Garantia Kréditu aprova husi VI Governu Konstitusionál, ne’ebé prevee millaun U$4 liuhosi Orsamentu Jerál Estadu (OJE) 2017.

Sistema bankáriu ne’e hanesan polítika Governu nian atu fó apoiu ba empreza negósiu ki’ik sira, liuliu sidadaun sira ne’ebé hala’o atividade ekonomia barak liu iha setór informál hanesan kioske sira, inklui sidadaun sira ne’ebé serbisu iha agrikultura.

Inisiativa ne’e nu’udar mekanizmu ida atu fó apoiu ba empreza ki’ik no empreza médiu sira, nune’e Estadu fahe risku husi konsesaun kréditu ho Banku Komersiál sira atu fó garantia ho montante másimu porsentu 70 husi empréstimu ne’ebé hetan no kumpre rekizitu legál sira ne’ebé mak estabelese ona.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here