Sherley Siki, Estudante Mestradu iha Fakuldade Siénsia no Komunikasaun Universidade Atma Jaya Yogyakarta.

Autor: Sherley Siki

Prezensa mídia dijitál iha era mileniu fó impaktu boot ba mundu mídia nian. Sasse (2016:57) esplika, website la’ós ona sai de’it nu’udar mídia ida hodi disemina informasaun, maibé evolui ona sai instrumentu komunikasaun interativu ida. Inovasaun internet ne’ebé lori aplikasaun interativu ba parte rua iha komunikasaun, halo públiku la’ós de’it sai nu’udar konsumidór, maibé sai mós produtór hodi kria konteudu informasaun. Ho situasaun ida ne’e kompañia mídia sosiál uza oportunidade hodi kria sira nia produtu hodi atrai atensaun husi konsumidór informasaun sira.

Konseitu hodi kria produtu dijitál ida ne’e nu’udar konseitu ekonomia foun. Kompañia mídia sosiál hanesan Facebook, Instragram, Twitter, Youtube, Whatsapp, Line no seluk tan, ida-ida kria sira nia merkadu espesializadu (niche market) hodi kompete no sai nu’udar lider iha merkadu ne’e.

Hanesan negósiu iha mídia konvensionál sira seluk, kompañia mídia sosiál hetan mos lukru husi publisidade. Kliente loloos ba sira maka anunsiante sira ne’ebé selu ba kompañia mídia sosiál hodi bele hatudu sira nia produtu iha plataforma ne’ebé kompañia fornese. Bainhira mídia sosiál ida bele hetan asesu husi ema barak, sei sai potensiál hodi bele hetan mós atensaun husi utilizadór mídia sosiál sira atu bele alkansa objetivu ho fasíl.

Dadus utilizadór mídia sosiál sai nu’udar produtu ne’ebé uza hodi faan, asesu ba anunsiante sira. Google nu’udar kompañia boot ba makina hodi buka asuntu ruma no Facebook nu’udar kompañia mídia sosiál ho utilizadór ne’ebé barak liu iha mundu hetan rendimentu kuaze porsentu 25 husi publisidade globál nian. Iha tinan 2017 totál rendimentu ne’ebé Facebook hetan besik rendimentu ida ho balun husi Google nian no dadaun sei sa’e liutan (Business Disptuptor: 2017).

Daudaun utilizadór mídia sosiál barak ne’ebé iha istória susesu tanba hetan rendimentu boot husi kompañia mídia sosiál liu husi kria konteudu, tantu liu husi hakerek no kria vidio hodi públika iha Website, Instagram no Youtube.

Exemplu atu hetan rendimentu husi Youtube, utilizadór tenke hili konteúdu ne’ebé bele atrai utilizadór sira no tenke tuir prosidementu ne’ebé Youtube estabelese, nune’e bele hetan rendimentu husi subscriber ne’ebé asiste sira nia konteúdu. Kuaze rendimentu Youtuber sira hetan pelumenus $18 kada utilizadóres 1000 ne’ebé asiste publisidade ou hanesan $3-$5 kada utilizadór 1000 ne’ebé asiste konteudu vídeo (influencermarketinghub.com).

Hanesan mós iha blogger sira ou na’in ba website ne’ebé hetan rendimentu liu husi pay per click (PCP) husi Google AdSense nu’udar forñesedor plataforma ne’ebé domina no populár iha mundu. Liu husi Google Adsense ne’e utilizadór la presija buka anunsiante no halo negosiasaun diretamente, tanba Google maka halo ona buat hotu-hotu inklui kalkulasaun. Liu husi modelu ne’ebé fasil tebes, publisidade sei hatudu iha website no nain ba website sei hetan selu kuandu ema klik iha website refere. Rendimentu ne’bé nain ba website hetan maka pursentu 68 husi publisidade iha Google AdSense. Hanesan ezemplu, kuandu anunsiante selu $100 ba Google, Google sei selu $68 na’in ba website.

Ho rendimentu ne’ebé hetan husi kompañia mídia sosiál rua ne’e, halo website no Youtube channel mosu hanesan kulat iha tempu udan. Situasaun ida ne’e mós hamosu oportunidade ba utilizadór mídia sira seluk ne’ebé hakarak hetan lukru liuhusi dalan ilegál hodi kria ID falsu no disemina notísia ne’ebé la loos ska hoax. Septiaji Nugroho, Koordenadór ba Masyarakat Anti Fitnah Indonesia (MAFINDO) esplika, mídia ne’ebé mosu iha tempu la’ós bain-bain no afirma serbisu hanesan jurnalismu, sai nu’udar indikadór ida hodi bele hamosu mós notísia sira ne’ebé laloos ka hoax ho nia objetivu atu hatun parte seluk. Hanesan ezemplu prátika ne’ebé Channel News Asia (2019) públika kona ba Mikro Ceselkoski, ema Macedônia.

Iha tinan 2016 Ceselkoski ho joven balun iha nia sidade kria website oin-oin hodi fó apoiu ba Prezidente Amerika, Donal Trump, la’ós tanba objetivu polítiku maibé hodi bele hetan rendimentu. Channel news Asia hateten sira nia rendimentu iha momentu bele to’o rihun $100 kada fulan. Sira kria clickbait liu husi hatudu títulu kona-ba hahalok ne’ebé positivu husi Prezidente Trump. Títulu ne’e dada ema barak ne’ebé apoiu Prezidente Trump hodi klike no fahe notísia ne’e. Buzzfeed News Mídia halo investigasaun ba prátika ne’e no nia rezultadu hatudu, website sira ne’e maioria fahe notísia ne’ebé la loos ka hoax. Ceselkoski ikus mai sai famozu tanba prátika ne’ebé nia hala’o kuaze tinan rua no ema hotu fiar katak, tanba ninia prátika ne’e implika ba Prezidente Trump ninia vitória iha Eleisaun Prezidensiál Estadu Unidu Amerika iha 2016. Daudaun ema bolu nia the man who helped Donald Trump to win the US Election (Channel News Asia, 2019).

MAFINDO estuda, motivasaun ema kria notísia ne’ebé la loos ka hoax iha Indonézia maioria tanba ekonomia hodi hetan rendimentu, razaun polítika no razaun afiliasaun ba grupu étniku no relijiaun, no hakarak fó impaktu hodi estraga ema seluk.

Prátika real ne’ebé bele haree maka, clickbait hala’o husi mídia ne’ebé laloos, hodi públika fila-fali konteúdu notísia husi mídia imprensa akreditadu sira hodi ilegálmente troka no aumenta elementu ne’ebé bele halo notísia ne’e sai sensasionál bainhira ema seluk lee.

Iha assuntu polítiku no étniku no relijiaun, notísia hoax sai dalan ida husi líder politiku sira atu hatún sira nia rivál sira. Chia Yong Yong, Member Select Committee on Deliberate Online Falsehood hateten, iha era daudaun ne’e, ema la presiza funu uza kilat, lasu de’it liuhusi kria disputa no diskonfia, liu husi notísia bosok ka fake news. Ida ne’e mós daudaun ita bele sente iha klima polítika iha Timor-Leste.

Infelismente Mídia Sosiál mosu no dezenvolve iha ita nia leet daudaun ne’e la la’o hamutuk ho kompriensaun komunidade kona-ba literasia mídia ne’ebé natoon. Ema barak tantu ema ho nivel edukasaun ne’ebé aas sai nu’udar vitima ba ema sira ne’ebé kria notísia bosok ka hoax.  Bainhira ita rejistu ita nia aan sai utilizadór mídia sosiál, diretamente ita mós tama iha sirklu merkadu mídia dijitál nian, hodi sai nu’udar sira nia konsumidór. Tan ne’e, ita mós labele sai vítima hodi apoiu no sirkula notísia hoax ne’ebé kria husi ema ho ID falsu tanba ikus mai bele estraga ita no ita nia komunidade nia hanoin. Dalan di’ak mak ita tenke halo verifikasaun ba notísia ne’ebé loloos antes fahe notísia hodi kombate notísia hoax no prevene sokar liu-liu husi mídia.

Hakerek nain nu’udar estudante Masteradu iha Fakuldade Siénsia no Komunikasaun Universidade Atma Jaya Yogyakarta

Referensia:

Channel News Asia. Meet the Fake News Trolls Who Influence US and Indonesian Pools for Money. Assesu husi https://www.channelnewsasia.com/news/cnainsider/trolls-fake-news-industry-elections-veles-malaysia-indonesia-us-11087430 Iha loron 27 Maiu 2020

Influencer Marketing Hub. How Much do Youtuber Make? A Youtuber Pocket Guide. Assesu husi https://influencermarketinghub.com/how-much-do-youtubers-make/ iha loron 28 Maiu 2020

Poskita. Tantangan Mídia Massa Dijitál Kita. Asesu husi http://poskita.co/2020/05/27/tantangan-mídia-massa-dijitál-kita/ iha loron 27 Maiu 2020

Sasse, Robert. 2016. A Micro-Economic Perspective on Social Mídia in Context of the New Economy. Poland : University of Gdańsk

HAKEREK NO HATÁN

Please enter your comment!
Please enter your name here