Ministru Transporte no Komunikasaun, José Agostinho da Silva. Imajen Tatoli/Egas Cristovão

DILI, 03 juñu 2020 (TATOLI) – Ministru Transporte no Komunikasaun, José Agostinho da Silva, informa implementasaun subsídiu ba kondutór sira ne’ebé rejistu ona iha Konsellu Administrasaun Institutu Nasionál Seguransa Sosiál (INSS) no internet gratuita ba estudante rai-laran sira tarde tanba daudaun orsamentu Fundu COVID-19 ho totál miliaun $150  la sufisiente atu sustenta despeza ne’e, inklui pakote ekonómiku seluk.

“Seidauk implementa medida ezekusaun Estadu Emerjénsia hanesan subsídiu ba kondutór sira no internet gratuita ba estudante sira ne’ebé ministériu planea ona tanba ita-nia orsamentu Fundu COVID-19 sei menus, entaun ita tenta bainhira iha kabementu orsamentu maka ita prontu atu ezekuta,” tenik Ministru José Agostinho ba Agência Tatoli, iha Palásiu Governu, kuarta ne’e.

Maski nune’e, governante ne’e dehan parte Ministériu Transporte no Komunikasaun (MTK) no Autoridade Nasionál Komunikasaun (ANC, sigla portugés) téknikamente preparadu bainhira iha orsamentu bele implementa ona.

Konsellu Ministru rasik aprova ona proposta autorizasaun hodi halo transferénsia estraordinária ho montante millaun $286,8 hodi reforsa saldo tezouru no Fundu COVID-19 hodi finansia pakote ekonómiku.

Pakote ekónomiku ne’ebé to’o agora orsamentu seidauk iha hanesan suplementu remuneratóriu no subsídiu porsentu 60 ba traballadór inklui programa sira seluk.

Prezidente Konsellu Administrasaun INSS, Longuinhos Armando, informa tuir dadus daudaun kondutór transporte públiku ne’ebé rejistu iha INSS hamutuk 6.000-resin no sei bele hetan subsídiu hosi Governu.

Nia hateten, seguransa sosiál fó rejistu ba kondutór transporte públiku sira ne’ebé tula pasajeiru hahú loron 11 maiu iha seguransa sosiál.

Tuir medida ezekusuan Estadu Emerjénsia iha Dekretu 16, artigu 5 númeru 2 hateten katak Governu fasilita transporte publiku ne’ebé tula pasajeiru hodi rejistu iha seguransa sosiál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here