Grupo Movimentu Tasi Mos servisu hamutuk ho Polisia Nasional Timor Leste rega disinfektante ba estrada publiku, jardim Largo Lecidere no jardim BJ Habibie, Sexta 15 Maiu 2020.Imajen/Antonio Goncalves

AINARO, 03 juñu 2020 (TATOLI)-Atu prevene propagasaun surtu COVID-19 ba estudante sira maka, Servisu Saúde Munisípiu Ainaro daudaun ne’e rega ona ai-moruk dezinfetante ba eskola hamutuk 85.

Diretór Saúde en ezersísiu Munisípiu Ainaro, Arnaldo Lima da Silva, hateten programa ne’e hanesan meiu ida atu kombate transmisaun surtu coronavirus ba labarik estudante sira bainhira re-ativa prosesu aprendijazen.

“Ha’u orienta ona ekipa Saúde sira halo ona vizilánsia hodi rega ai-moruk dezinfetante hahú husi Igreja iha loron rua liubá. Ami mós halo ona dezinfetante ba eskola sira iha loron ida liubá,”dehan nia ba Agência TATOLI, iha Eskola Ensinu Báziku Sentrál, Venáncio Ferrez Ainaro, kuarta ne’e.

Nia hatutan programa ne’e konsege realiza ho di’ak tanba hetan apoiu materiál husi parseiru sira no mós kooperasaun husi Diresaun Protesaun Sivíl, Seguransa, Bombeiru, Dirijente Eskola no Amu Paróku Ainaro.

Entretantu, Ministra Edukasaun Juventude no Desportu (MEJD) Dulce de Jesus Soares, apresia ho servisu Saúde Munisípiu Ainaro tanba rega ona ai-moruk dezifetante iha eskola sira.

“Ha’u fó agradese tomak ba ita bo’ot husi servisu ne’ebé realiza ona inklui relatóriu detalladu kona-ba servisu vijilánsia sintenela ne’ebé parte saúde realiza ona. Ha’u pesoál orgullu ita bo’ot sira-nia servisu no esforsu sira,” dehan Dulce.

Iha parte seluk kona-ba rejultadu servisu ekipa vijilánsia sentinela ba prevensaun COVID-19 iha Ainaro, Diretór Saúde en ezersísiu Munisípiu Ainaro, Arnaldo Lima da Silva, relata iha Sentru Saúde Ainaro foti amostra ba ema na’in 20 no rejultadu negativu.

Nune’e mós amostra husi Ospitál Referál Maubisse halo ba ema hamutuk 50, no rejultadu negativu hotu tanba ne’e Munisípiu Ainaro livre ona husi transmisaun surtu coronavirus.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here