Embaixadór Timor-Leste ba Kambodia Hermenegildo Lopes. Imajen Tatoli/Egas Cristovão

DILI, 03 juñu 2020 (TATOLI)-Embaixadór Timor-Leste iha Kambódia, Hermenegildo  Kupa Lopes hateten relasaun amizade entre Timor-Leste ho Kambódia to’o oras ne’e kontinua la’o di’ak no metin liután.

“Ha’u nia misaun iha ne’e sei hametin liután relasaun entre Timor-Leste ho Kambódia, nasaun rua nia relasaun uluk kedan to’o agora di’ak los, ba oin nasaun rua sei metin liután,”informa, Kupa ba TATOLI, via mídia sosiál whatsapp, kuarta ne’e.

Diplomata Timoroan ne’e mós foinlalais hasoru ona Primeiru-Ministru, Samdech Hun Sen, hodi hametin liután kooperasaun entre nasaun rua.

Aleinde ne’e, hala’o mós vizita kortérjia bá reprezentasaun nasaun seluk liliu nasaun membru AZEAN iha Kambódia.

“Misaun dahuluk ha’u hala’o vizita ba iha nai-ulun sira rai ne’e nian no diplomata sira hosi nasaun li’ur sira ne’ebé iha Kambódia nia laran atu buka hametin lasu amizade,” nia esklarese liután.

Iha parte seluk, Embaixadór Timor-Leste iha kambódia ne’e hateten, foinlalais sira mós fó apoiu ekipamentu prevensaun COVID-19 hanesan hand sanitazer, máskara no seluk tan.

“Ami nia vizita ba Senadu Prezidente Kambódia,  iha mós oportunidade ba ami hodi fó apoiu ekipamentu ajuda kombate COVID-19 ba sira, haree ba agora situasaun COVID-19, ajudu ne’e halo tanba Kambódia mós nasaun ida ne’ebé espesiál mai ita,”dehan nia.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here