Ministru Transporte no Komunikasaun, José Agostinho da Silva. Imajen Tatoli/Egas Cristovão

DILI, 03 juñu 2020 (TATOLI) – Tama iha tinan klaran, VIII Governu seidauk iha Orsamentu Jerál Estadu (OJE) no sei uza Dotasaun Orsamentu Temporáriu, tanba ne’e daudaun ministériu sira hahú halo preparasaun orsamentu tinan fiskál 2020 hodi submete iha Parlamentu Nasionál (PN) iha jullu nia-laran.

Ba asuntu ne’e, Ministru Transporte no Komunikasaun, José Agostinho da Silva, informa nia parte orienta ona diretór sira hodi hahú halo preparasaun ba orsamentu, ne’ebé sei foku liu ba programa ne’ebé bele ezekuta iha tempu badak no programa nesesáriu atu implementa tanba tempu ezekusaun limitadu.

“Proposta orsamentu 2020, ha’u orienta ba tékniku sira atubele haree karik iha dívida ruma entaun foku atu rezolve no planeia programa ne’ebé ita bele ezekuta ho nia alokasaun orsamentu ne’ebé lójiku no rasionál atu ezekuta iha tempu ida limitadu tebes,” dehan ministru ne’e iha Palásiu Governu, kuarta ne’e.

Kona-ba dívida Ministériu Transporte no Komunikasaun (MTK), tuir governante ne’e iha planu balun ne’ebé nia pagamentu pendente tanba liga ba prosesu aprovizionamentu ne’ebé afeta ba ezekusaun ministériu nian.

“Iha OJE 2020 tenke rezolve dívida no ba proposta OJE 2021 mak foin hatama programa prioridade hodi ezekuta ho tempu sufisiente,” nia akresenta.

Montante orsamentu ba ministériu ne’ebé área kobertura liga liu ho atendimentu públiku ne’e, seidauk fiksa tanba sei iha faze diskusaun iha nível diresaun.

Antes ne’e, OJE 2020 ne’ebé sumba iha PN, alokadu ba MTK ho montante miliaun $10,787, kompostu husi kapitál dezenvolvimentu milliaun $3,793, saláriu no vensimentu millaun $1,496 no bens no servisu millaun $5,499.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here