Komandante Jerál PNTL, Komisáriu Faustino da Costa. Imajen/Egas Cristovão

DILI, 03 juñu 2020 (TATOLI) – Komandante Jerál Polísia Nasionál Timor-Leste (PNTL), Komisáriu Faustino da Costa, rekoñese liña fronteira terrestre frajil tebes ba sidadaun Timoroan no Indonézia hodi tama-sai ilegál.

Notísia Relevante : Xanana Apresia Esforsu UPF ho F-FDTL Asegura Fronteira Terrestre

“Loos duni, kuaze kada loron sei iha ema tenta hakat tama fronteira Timor-Leste, tantu Timoroan no sidadaun Indonézia,” informa Komisáriu  Faustino da Costa, ohin, ba jornalista liuhusi konferénsia imprensa iha Komandu Jerál PNTL, Caicoli, Dili.

Iha 02 juñu 2020, Unidade Patrullamentu Ffronteira (UPF) kaer sidadaun Indonézia na’in-tolu (3) halo atividade ilegál kasa animál  iha área Timor-Leste iha fronteira Tilimar-Covalima,  hodi deporta fila liuhusi kooperasaun ho autoridade militár Indonézia nian.

Iha Fronteira Motain-Batugade, Bobonaro mós UPF Postu Badut Mean, Beemalae- Palaka nian, kaer mós Timoroan na’in-hitu (7) ne’ebé tenta lori foos, masin-midar no tua tama ba área Indonézia.

UPF halo mós apreensaun ba sasán sira hodi prosesa  Timoroan sira-ne’e tuir lei no sidadaun Indonézia balun haruka fila ba Atambua, tanba seidauk halo kontaktu fíziku ho Timoroan.

Iha Postu Fronteira Oe-Cusse, PNTL kaer mós estudante Timoroan na’in-ida ne’ebé tama ilegál no  agora ekipa Sentru Integradu Jestaun Krize (CIGC) hatama estudante ne’e iha kuarentena Oe-Cusse nian.

Atu evita problema ne’e, daudaun ne’e Komandu PNTL orienta ona UPF Batugade, Maliana, Covalima no Oe-Cusse envolve Ofisiál Polísia Suku (OPS) kada munisípiu koordena ho autoridade suku, halo ona patrullamentu hodi asegura metin liután lutu fronteira rai no tasi.

Durante periodu Estadu Emerjénsia primeiru too mai agora, Komisáriu Faustino da Costa, hateten situasaun seguransa territóriu Timor-Leste la’o hakmatek no la akontese kazu krime boot ruma.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here