Komandante Jerál PNTL, Komisáriu Faustino da Costa. Imajen/Eugénio Pereira

DILI, 03 juñu 2020 (TATOLI) – Komandante Jerál Polísia Nasionál Timor-Leste (PNTL), Komisáriu Faustino da Costa, husu ba estudante Timoroan sira ne’ebé sei hela iha Indonézia no rai seluk, atu tuur hamatek iha fatin too sitasaun COVID-19 iha Timor-Leste no diaspora normál ona mak bele vizita mai Timor-Leste.

Komisáriu Faustino da Costa, hato’o mensajen ne’e hodi responde ba preokupasaun estudante Timoroan balun iha Indonézia ne’ebé hala’o konferénsia imprensa hodi husu  Governu Timor-Leste no PNTL atu loke fronteira hodi fasilita sira fila mai Timor-Leste.

Komisáriu Faustino dehan, la nesesáriu atu Governu loke fronteira agora, tanba Timor-Leste iha hela situasaun Estadu Emerjénsia (EE) tenke taka metin fronteira terrestre hodi luta hasoru propagasaun surtu Coronavirus ka COVID-19.

Tuir relatóriu husi Sentru Integradu Jestaun Krize (CIGC) fó sai katak, surtu Coronavirus ka COVID-19 akontese tanba movimentu sidadaun sira fila husi Indonézia maka hada’et tutan ba ekipa estudante sira. Nune’e PNTL sei hala’o knaar tuir lei hodi asegura metin fronteira rai-maran no tasi.

“Kazu sira ne’ebé akontese iha fulan kotuk rejista pasiente na’in-24 ne’e la’ós moras própriu iha Timór, maibé mai husi ita nia Timor-oan sira ne’ebé iha rai li’ur. Tanba ne’e, husu hakmatek iha fatin, hakbesik ba embaixada hodi rezolve problema,” dehan Komisáriu Faustino ba jornalista, ohin, liuhusi konferénsia imprensa iha Komandu Jerál PNTL Caicoli, Dili.

Komisáriu Faustino dehan, karik estudante sira iha problema ho osan ruma ka menus ai-han bele kontaktu família, liu-liu Embaixada Timor-Leste iha kada nasaun bele fasilita sira  ho di’ak no prevene mós sira husi surtu COVID-19.

Daudaun ne’e Fronteira Motain, Covalima no Oe-Cusse kada loron kuarta feira Governu haruka loke oras rua de’it hodi atende movimentu transporte sira ne’ebé tula sasán nesesidade báziku no ba movimentu ema sei la simu, tanba serbisu ne’e Diresaun Nasionál Migrasaun maka sei haree hodi koopera ho Autoridade Aduaneira ka Alfándega Timor-Leste.

 Jornalista : Eugénio Pereira

Editór       : Francisco Simões

 

1 KOMENTÁRIU

HAKEREK NO HATÁN

Please enter your comment!
Please enter your name here