Reprezentante UNICEF iha TL, Valerie Taton, sukat hela labarik feto ida ninia aas iha serimonia ne’e. Imajen mídia UNICEF

Peskiza sei fornese informasaun kona-ba estatutu nutrisionál husi labarik sira iha TL

DILI, 3 juñu 2020 (TATOLI) – Ministeriu Saúde (MS), ohin lansa prosesu rekolla dadus no informasaun ba peskiza ai-han no nutrisaun iha Timor-Leste (TL) ba 2020, hodi hadi’a planu no implementasaun hasa’e labarik sira-nian estatutu nutrisionál.

Nota komunikadu ne’ebé TATOLI simu hosi mídia Fundu Nasaun Unida ba labarik (UNICEF, sigla inglés) iha TL haktuir rezultadu peskiza ne’e sei ajuda ministériu no parseiru sira hodi kompriende situasaun atuál relasiona nutrisaun labarik sira tinan lima mai kraik. Peskiza nutrisaun ne’e apoia ona husi UNICEF ho fundu husi Uniaun Europeia no Programa Mundiál ba Ai-han (WFP-sigla inglés) ho fundu husi Ajénsia Kooperasaun Internasionál hosi Korea (KOICA).

Ekipa sira ne’ebé atu halo peskiza foto hamutuk hafoin serimonia lansamentu. Imajen mídia UNICEF

Prosesu ne’e hala’o ona iha Vila Verde, Aldeia Guideon, Munisípiu Dili husi Gaspar Soares, Prezidente Autoridade Munisípiu Dili, Odete da Silva Viegas, Diretora Jerál Prestasaun Servisu Saúde, Ministeriu Saúde, Andrew Jacobs, Embaxador Uniaun Europeia, Valerie Taton, Reprezentativa UNICEF no Dageng Liu, Reprezentativa WFP.

“Dezenvolvimentu país ne’e iha risku bainhira nia labarik sira-nia nutrisaun komprometida, karik kuran ai-han nutritivu, ka falta injestaun”, dehan Odete da Silva Viegas. “Peskiza ne’e sei ajuda ita kompriende labarik nia situasaun nutrisaun no haree karik iha ona progresu ka la’e”.

Peskiza nutrisaun ne’e sei halo entre loron 4 fulan-juñu no 4 fulan-setembru 2020. Durante peskiza ne’e, inumeradór 64 sei vizita uma-kain 12.740 iha país laran-tomak, rekolla informasaun kona-ba antropometria, prátika fó han-nian, bee, saneamentu no ijiene, seguransa ai-han no saúde no hahalok buka nutrisaun.

Rezultadu peskiza sira sei halo analize no evaluasaun husi Ministeriu Saúde. Rezultadu pre-limináriu sei divulga iha meadu fulan-setembru 2020.

Peskiza ikus kona-ba seguransa ai-han no nutrisaun halo iha 2013, ne’ebé hatudu katak labarik ida husi nain rua tinan lima mai kraik iha TL raes-badak – ne’e mak taxa aas-liu husi raes-badak iha mundu.

“Labarik sira barak mak la hetan ai-han nutritivu no kuidadu saúde nesesaria. Ne’e prejudika sira-nia kapasidade kresimentu, dezenvolve no aprende iha sira-nia potensia tomak. Ne’e la’ós estraga de’it labarik sira-nia aan maibe ne’e impaktu negativu ba sosiedade. Ohin loron, ha’u orgullu atu lansa prosesu rekolla dadus nutrisaun ho “inumerador formadu sira” ne’ebé sei fornese informasaun importante kona-ba labarik Timor-oan sira-nian ho sira-nia inan sira-nia estatutu nutrisaun”.

Nia hatutan: “Ha’u partikularmente interesadu atu hatene impkatu husi servisu realiza ona hodi kona-ba má nutrisaun husi Ministériu Saúde ho departamentu governu sira seluk ho apoiu husi Uniaun Europeia, UNICEF ho sira seluk. Ita nia parseria dezignadu atu hadi’a populasaun-nia moris di’ak no estatutu nutrisional”, dehan Andrew Jacobs, Embaxador Uniaun Europeia ba TL.

UNICEF fornese apoiu boot tebes ba programa nutrisaun iha TL. Ne’e inklui promosaun, protesaun no apoiu fó susu-been inan, ai-han komplementária, tratamentu desperdisu, suplementasaun mikro-nutriente no fortifikasaun no konsientizasaun iha país tomak kona-ba oinsá inan-aman sira no kuidadór sira bele garante labarik sira hetan ai-han nutritivu, ka buka asisténsia médika bainhira presiza.

“Má nutrisaun ne’e emerjénsia ida subar hela mak afeta ba labarik sira. Karik ita la hatene kona-ba nia problema no rezolve ho lalais iha labarik nia siklu moris, ne’e bele iha impaktu desvastadór ba labarik sira-nia futuru”, dehan Valerie Taton, Reprezentativa UNICEF iha TL. “Tanba ne’e mak UNICEF apoia hela ona inisiativa importante atu avalia impaktu husi má nutrisaun ba labarik sira”.

Globalmente, estatistika hatudu ona katak besik metade husi labarik tinan lima mai kraik sira-nia mate bele tanba des-nutrisaun. Má nutrisaun atraza labarik sira-nia kresimentu, halakon vitamina no minerál esensiál sira, no halo sira vulneravel liu ba moras. (ki)

HAKEREK NO HATÁN

Please enter your comment!
Please enter your name here