Fronteira Terrestre Mota-Ain, Batugade, Imajen Tatoli/António Gonçalves

DILI, 03 juñu 2020 (TATOLI) – Ministru Defeza no Seguransa no Ministru Interiór interinu, Filomeno da Paixão de Jesus, husu ba sidadaun hotu, liuliu komunidade sira besik iha fronteira terrestre Timor-Leste ho Indonézia hanesan Batugade, atu hamutuk ho FALINTIL-Forsa Defeza Timor-Leste (F-FDTL) no Polísia Nasionál Timor Leste (PNTL) hodi asegura país ne’e hodi ema labele tama ilegál, nune’e bele evita propagasaun surtu COVID-19.

Ministru ko’alia asuntu ne’e relasiona ho maski Governu deside taka ona fronteira terrestre durante Estadu Emerjénsia tanba kuaze kazu konfirmadu iha Timor-Leste konsidera hanesan importadu husi nasaun efetadu, maibé nafatin iha sidadaun ne’ebé sei tama klandestina.

“La’ós Forsa no Polísia de’it maka asegura, maibé iha Konstituisaun hateten populasaun hotu tenke hamutuk asegura. Ita hatene  Forsa no Polísia sei limitadu, tanba ne’e populasaun iha aldeia no suku sira presiza hamutuk apoia ekipa iha fronteira sira hodi halo patrullamentu iha fronteira atu asegura ema tama ilegál hodi lori vírus ne’e mai ita-nia rai,” tenik Ministru Filomeno hafoin iha Palásiu Governu, kuarta ne’e.

Iha loron 18 maiu, Portavóz Sala Situasaun Sentru Integradu Jestaun Krise (CIGC, sigla portugés), Rui Maria de Araújo, informa durante Estadu Emerjénsia sidadaun ne’ebé maka tama klandestinamente ba territóriu Timor-Leste husi fronteira terrestre hamutuk na’in-110.

Husi totál ne’e, ema na’in-48 tama husi Fronteira Batugade, husi Fronteira Salele na’in-ualu, Fronteira Oé-silo no Sakato hamutuk na’in-58. 

Tuir governante ne’e presiza duni reforsa seguransa iha fronteira terrestre atu asegura ema labele tama ilegál mai Timor-Leste iha períodu Estadu Emerjénsia ba datoluk ne’e.

Antes ne’e, Komandante Jerál Polísia Nasionál Timor Leste (PNTL), Komisáriu Faustino da Costa, rekoñese liña fronteira Terrestre frajil tebes ba sidadaun tantu timor-oan no indónéziu atu tama-sai ilegál.

Ho nune’e,  Komandu PNTL ne’e orienta ona Unidade Patrullamentu Fronteira (UPF) Batugade, Maliana, Covalima no Oe-Cusse, hodi envolve ho Ofisiál Polísia Suku (OPS) iha kada munisípiu hodi koordena ho autoridade suku halo patrullamentu hodi asegura fronteira rai no tasi.

Dadus atuál fó sai katak daudaun kazu konfirmadu iha Timor Osidentál hamutuk 97 no husi totál ne’e na’in-14 maka rekuperadu enkuantu na’in-ida maka mate.

Hafoin Timor-Leste rejista kazu pozitivu COVID-19 dahuluk iha 21 marsu 2020, kazu ikus liu rejista iha 24 abríl ho totál konfirmadu na’in-24 no provável na’in-haat.

Iha loron 15 maiu, liuhosi Sala Situasaun, CIGC deklara pasiente konfirmadu no provável rekuperadu hotu ona.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no Tama mai Timor-Leste liuhosi dalan fronteira terrestre no aeroportu.

Hahú loron 15 maiu, sistema alerta no resposta COVID-19 iha Timor-Leste  ne’ebé antes ne’e iha alerta 3 ‘Mitigasaun’, fila ba faze alerta 1 ‘Kontensaun’, nune’e komunidade sira bele kontinua halo prevensaun ba an rasik.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here