Vise-Ministra Finansa, Sara Lobo Brites. Imajen Tatoli/Egas Cristovão

DILI, 03 juñu 2020 (TATOLI) – Haree ba preparasaun proposta Orsamentu Jerál Estadu (OJE) tinan rua nian (2020 no 2021) dala-ida de’it maka Governu liuhosi Ministériu Finansa (MF) sei simplifika ka habadak prosesu praparasaun.

MF sei la realiza Jornada Orsamentál no Komité Revizaun Orsamentu Polítika (KROP) ne’ebé kada tinan sempre realiza bainhira Governu halo preparasaun ba OJE.

Vise-Ministra Finansa, Sara Lobo Brites, hateten kona-ba orsamentu 2020, fulan-maiu nia-laran MF aprezenta tiha ona kalendáriu iha Konsellu Ministru no hetan ona aprovasaun, daudaun ne’e tékniku MF liuliu Dirasaun Jerál Planeamentu Orsamentu sira servisu hamutuk ho ministériu relevante hodi halo levantamentu dadus.

“Tuir kaléndariu ne’ebé Ministériu Finansa prepara, orsamentu ne’e prátikamente ba de’it tinan-2020 nia-laran, maibé ezekusaun kuaze la’o tiha ona ho duodésimu entaun sei habadak prosesu barak, liuliu prosesu sira hanesan Jornada Orsamentál inklui Komité Revizaun Orsamentu Polítika mós sei la realiza. Ministériu Finansa simplifika ninia prosesu atubele kumpre kalendáriu ne’ebé mak aprova ona iha loron 30 jullu 2020,” hateten Vise-Ministra Finansa iha Palásiu Governu, kuarta ne’e.

Tuir governante ne’e, bainhira atu submete proposta OJE depende ba koordenasaun entre ministériu tutela ho Parlamentu Nasionál (PN).

“Submisaun ba Parlamentu depende koordenasaun entre Ministériu Asuntu Parlamentár no Komunikasaun Sosiál ho Parlamentu atu haree kalendáriu Parlamentu nian rasik, tanba Parlamentu rasik sei iha períodu resesaun ne’ebé kada tinan sempre akontese iha fulan-jullu to’o setembru entaun Governu hein hela ordén husi ministériu tutela atu fó hatene loron hodi submete orsamentu,” dehan Sara Lobo.

Kona-ba montante OJE 2020 no 2021, Governu seidauk bele fó sai tanba sei iha prosesu preparasaun.

“Montante OJE 2020 ha’u seidauk bele divulga tanba agora iha faze inísiu, maibé klaru katak despeza sira ne’ebé akontese ona durante períodu doudésimu sei enkuadra hotu, hafoin asegura mós despeza durante fulan-tolu iha tinan nia rohan, ne’ebé Governu seidauk iha dadus finál,” nia akresenta.

Daudaun ne’e MF foku hela ba proposta OJE 2020, enkuantu kalendáriu OJE 2021 sei hein Membru Governu sira simu hotu pose maka bele aprezenta, maibé tuir planu semana oin Governu sei aprezenta kelendáriu proposta OJE 2021 ba KM.

Ezekutivu sira halo preparasaun ba proposta OJE tinan-rua simultániamente maibé kalendáriu maka diferente, ne’ebé tuir kalendáriu submisaun proposta OJE 2020 ba PN iha fulan jullu enkuantu OJE 2021 nian iha loron-15 fulan outubru.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here