José Luís Guterres ‘Lugu’. Imajen Tatoli/Egas Cristovão

DILI, 03 juñu 2020 (TAOLI)–Prezidente Autoridade Rejiaun Administrativa Espesiál Oé-Cusse Ambeno (RAEOA) no Zona Espesiál ba Ekonomia Sosiál Merkadu Timor-Leste (ZEESM-TL), José Luis Guterres “Lugu”, hala’o lansamentu ba programa pulverizasaun insetisida (pulverizasaun reziduál interna) no fahe moskiteiru ba komunidade hotu iha RAEOA.

Komunikadu ne’ebé TATOLI asesu husi média Prezidente Autoridade RAEOA hateten, lansamentu ba Programa ne’e hala’o iha Suku Lifau Sub-Rejiaun Pante Makasar, RAEOA, tersa (02/06/2020).

Iha sermiónia lansamentu ne’e, Prezidente Autoridade José Luis Guterres “Lugu” hateten, sosializasaun hosi ofisiál saúde kona-ba prevensaun sedu ba hada’et moras malária importante tebes, atu nune’e komunidade komprende no oinsá bele prevene tanba RAEOA poténsia ba risku tranzmisaun malária, no ohin loron área balun iha fronteira rejistu endémika malaria aas tebes.

“Ha’u husu konxiénsia povu Atoni oan atu tuir protokolu Ministériu Saúde nian kona-ba prevensaun moras infesaun malaria. Ne’e importante liu atu redús númeru kazu ne’ebé akontese iha RAEOA,” Prezidente Autoridade, José Luís Guterres “Lugu”, hateten.

Prezidente Autoridade Lugu afirma, Ministériu Saúde no komunidade tenke servisu hamutuk atu kombate moras malária tanba Timor-Leste, liuliu RAEOA se prevalénsia kazu malária aas ne’ebé sei afeta ba investór sira mai investe iha rai laran, no mós turista sira ta’uk atu pasa férias, ne’ebé sei afeta ba kresimentu ekonomia nasaun nian.

Tanba ne’e, líder másimu RAEOA ne’e fó hanoin ba komunidade atu koopera ho Ekipa Brigada Choque ne’ebé esforsu maka’as atu sosializa no hala’o prevensaun kona-ba surtu Coronavirus (COVID-19) iha RAEOA.

“Ita agradese ba komisaun COVID-19, tanba sira servisu maka’as no to’o ohin loron ita seidauk rejistu ba kazu pozitivu, nune’e temporariamente RAEOA sei livre hosi COVID-19,” dehan Lugu ba komunidade sira iha lansamentu ne’e.

Lugu hameno hela ba komunidade Suku Lifau, katak Autoridade RAEOA-nia gabinete nakloke nafatin ba komunidade atu hato’o sira-nia preokupasaun no kritika sira hodi Autoridade bele serbi ho di’ak ba povu-nia moris.

Iha fatin hanesan, Xefe Departamentu Programa Nasionál ba Kontrola Malaria iha Ministériu Saúde, Maria do Rosário de Fátima Mota, hateten Timor-Leste nasaun ida ne’ebé rejistu kazu malária aas iha nasaun sira Sudeste Aziátiku ho totál kazu 223,002 entre tinan 2002-2006.

“Númeru kazu malária ita hahú iha faze eliminasaun ho anuál insidénsia parazita (sigla Inglés, API), menus hosi ema ida kada 1,000 abitante iha tinan 2013. Felizmente, ita redús drástiku iha 2017 ho númeru kazu malária hamutuk 90. Maibé, infelizmente, kazu malária 88 mai hosi komunidade RAEOA, bazeia ba dadus hosi Saúde Rejionál RAEOA,” dehan Xefe Departamentu Programa Nasionál ba Kontrola Malária, Ministériu Saúde iha serimónia lansamentu ne’e.

Nia informa, parte saúde rejionál RAEOA identifika kazu malária pozitivu ba pasiente nain-rua iha inísia tinan ne’e, pasiente na’in-rua ne’e mai hosi Suku Lifau no seluk hosi Aldeia Citrana, Suku Beneufe, Sub-rejiaun Nítibe.

Tanba ne’e, nia dehan, sira hili Suku Lifau atu hala’o lansamentu ba programa pulverizasaun insetisida (pulverizasaun reziduál interna) no fahe moskiteiru ba komunidade hotu iha RAEOA.

“Fahe moskiteiru bazeia ba númeru uma-kain no moskiteiru ne’e halo ona insetisida. Bainhira susuk metin hela iha rede moskiteiru, nia bele mate. Moskiteiru ne’e bele uza ho durasaun tinan-tolu bainhira ita kuidadu didi’ak,” nia dehan.

Nia esplika, malária mak moras tranzmisaun ida ne’ebé kauza hosi susuk anófeles no susuk ne’e hahú tata ema entre oras tuku neen lokraik no tuku neen dadeer. Nune’e, nia apela ba komunidade iha RAEOA atu autoriza ekipa bele hala’o pulverizasaun insetisida iha idak-idak nia uma.

“Posibilidade malária iha RAEOA bele importa hosi ita-nia país viziñu. Tanba ne’e, ita mós kontinua sosializa prevensaun malária ba komunidade iha fronteira, teste raan públiku atu identifika tranzmisaun lokál no karik hala’o tratamentu se komunidade ruma hetan pozitivu,” nia hateten.

Iha biban ne’e, Xefe Suku Lifau, Krisantos Kolo, agradese ba Prezidente Autoridade RAEOA no ekipa saúde rejionál, xefe departamentu programa nasionál ba kontrola malária, nomós parseiru sira hanesan HealthNet ne’ebé apoiu ona atu fahe moskiteiru no hala’o pulverizasaun iha suku refere hodi prevene tranzmisaun moras malária.

Lansamentu ba programa pulverizasaun insetisida (pulverizasaun reziduál interna) no fahe moskiteiru ba komunidade hotu organiza husi Saúde Rejionál RAEOA no hetan apoiu husi Organizasaun Naun-governmentál HealtNet, no Xefe Departamentu Programa Nasionál ba Kontrola Malária, no partisipa másimu hosi komunidade Suku Lifau.

Planu Estratéjiku Nasionál Ministériu Saúde ba tinan 2017-2021 liuhosi Programa Nasionál ba Kontrola Malária kompremitidu atu elimina Malária iha Timor-Leste to’o 2021.

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here