Imajen Espesiál.

DILI, 02 maiu 2020 (TATOLI)–Xefe Unidade Operasaun no  Relasaun Internasionál iha Gabinete Prezidente Autoridade Rejiaun Administrativa Espesiál Oe-Cusse Ambenu (RAEOA), Agustinho Caet, rekoñese durante ne’e Prezidente Autoridade José Luis Guterres lakohi hela iha uma estadu tanba autoridade anteriór seidauk entrega dokumentu legál ne’ebé justifika katak ne’e uma estadu duni.

Agustinho Caet hato’o lia hirak ne’e, ba Ajénsia TATOLI liuhosi telefonika hodi responde ba petisaun hosi reprezentante povu Atoni foin lalais ne’e, katak Prezidente autoridade Lugu desde simu pose to’o ohin loron kuaze fulan hitu (7) ona rezeita hodi hela iha uma estadu.

“Ida-ne’e, Prezidente autoridade deklara bebeik ona katak la’ós rezeita atu hela iha uma estadu ne’ebé prepara hela maibé uma ne’e sei iha problema uitoan kona-ba rai. Seidauk iha kompensasaun ba komunidade afetadu sira nu’udár na’in ba rai ne’ebé autoridade anteriór uza hodi halo uma ne’e. Tanba ida-ne’e mak Prezidente autoridade hanoin katak di’ak liu ita rezolve tiha uluk lai asuntu rai-ne’e, depois mak ita ba hela iha ne’eba ho hakmatek,” nia dehan Agostinho Caet ba Agência TATOLI liuhosi telefonika, tersa ne’e.

Caet hatutan, antes ne’e autoridade anteriór deklara ona katak rai ne’e sira sosa tiha ona hosi komunidade, maibé ita laiha dokumentu legál ruma ne’ebé autoridade anteriór rasik entrega ba autoridade atuál, atu bele komprova katak, los duni rai ne’e propriedade estadu.

“Ho razaun ida ne’e maka Prezidente autoridade Lugu deside atu labele ba hela lai iha fatin ida-ne’ebé sei iha hela problema. La’ós rezeita, maibé ita tenke ba hela duni iha ne’ebá tanba uma sira ne’e kobre ba investimentu públiku. Agora daudaun, autoridade esforsu hela atu buka rezolve mak foin bele ba hela iha ne’eba,” nia hateten.

Caet mós fó hanoin katak, durante situasaun politika rai laran la estavel no Corona Virus (COVID-19), Prezidente Autoridade mós rekoñese katak lahela metin iha Oe-Cusse tanba tenke halo negosiasaun ho Governu sentrál atu oinsa responde nesesidade povu Aton, ne’ebé konsege duni hetan rezultadu lubuk ida, hodi distribui nesesidade bázika ba estudante Oe-Cusse-oan sira iha Dili no komunidade ne’ebe kuran ai-han iha Oe-Cusse.

Foin lalais ne’e, reprezentante povu atoni, hatama petisaun ba órgaun soberania tolu hanesan Prezidente Repúblika, Parlamentu Nasionál no Governu, hodi ezije hasai Prezidente Autoridade Rejiaun Administrativa Espeiál Oe-Cusse Ambenu (RAEOA), José Luis Guterres, husi nia kargu tanba konsidera durante fulan hitu mandatu, Prezidente autoridade, José Luis Guterres rezeita atu hela iha uma estadu no deside ba hela fali iha uma privadu.

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here