Xefe Estadu Maiór Forsa Defeza Timor-Leste , Majór Jenerál Lere Anan Timur. Imajen/Antonio Goncalves

DILI, 03 juñu 2020 (TATOLI)–Xefe Estadu Maiór Jenerál FALINTIL Forsa Defeza Timor Leste (F-FDTL), Majór Jenerál Lere Anan Timur, kontinu husu ba Governu tau kria regulamentu ba arte-marsiál sira iha rai laran.

Notísia Relevante: KM Aprova Rezolusaun Reativa Arte-Marsiál

Líder másimu forsa armada ne’e husu relasiona ho disturbiu balun hosi arte-marsiál sira iha rai laran, iha fulan kotuk liuliu iha parte leste hanesan Munisípiu Baucau ho Viqueque.

“Ha’u informa ba Prezidente Repúblika kona-ba situasaun seguransa rai laran ladún grave, diak hela, apezar de problema entre arte-marsiál sira, hanesan Persaudaraan Setia Hati Terate (PSHT), Klibur Oan Rai Klaran (KORKA), Ikatan Kera Sakti (IKS), kria disturbiu iha fatin balun hanesan parte leste ninian, Baucau no Viqueque ninian, maibé ha’u hanoin ladún grave. Maibé kona-ba-ne’e, ha’u husu ba Governu atu normaliza, tenke iha regulamentu, iha kriteriu atu nune’e arte-marsiál sira bele kumpre,” Lere husu hafoin enkontru semanál ho Prezidente Repúblika, Francisco Guterres“Lú Olo”, iha Palásiu Prezidensiál Nicolau Lobato, Bairru Pité, Dili, kuarta ne’e.

Lere kontinua husu ba Governu atu oinsá regulariza arte-marsiál hanesan desportu, nune’e bele organizadu liután.

“Se lae, ita atu sai fali bandalizmu iha rai ne’e. Ha’u hanoin, ita labele admite fali ida-ne’e. Tenke organizadu. Hanesan uluk ha’u ko’alia bebeik ona katak, regula sasán sira-ne’e sai hanesan desportu ne’ebé tenke organizadu ho ninia kritériu rasik, atu sira bele halo tuir,” nia hateten.

Antes ne’e, Governu liuhosi reuniaun Konsellu Ministru (KM), aprova Proposta Rezolusaun Governu ne’ebé aprezenta hosi Primeiru-Ministru (PM), Taur Matan Ruak, ba revogasaun Rezolusaun Governu númeru 16/2013 10 jullu, ne’ebé bandu Grupu Arte-Marsiál (GAM) hala’o atividade.

Diploma legál ne’e, instroi Polísia Nasionál Timor-Leste (PNTL) atu intensifika asaun kombate krime sira kona-ba prátika ilísitu hosi Arte-Marsiál no Rituál sira.

Entretantu, iha loron 2 jullu 2013, Governu liuhosi desizaun KM estraordinária, hasai Rezolusaun Governu númeru 16/2013 kona-ba estinsaun GAM no determina estinsaun ba grupu Persaudaraan Setia Hati Teratai (PSHT), Ikatan Kera Sakti (IKS) no Klibur Oan Rai-Klaran (KORK), hodi bandu totál kontinuasaun ba kualkér atividade.

Rezolusaun ne’e define medida lubun ida-ne’ebé atu bele estabelese hikas fali órden públika no hakmatek iha sosiedade, ne’ebé hetan ameasa hosi hahalok hirak ne’ebé mak grupu ne’e halo.

Nune’e mós, Parlamentu Nasionál (PN) aprova iha 6 marsu 2017 no Prezidente Repúblika promulga iha 12 abríl 2017, lei númeru 5/2017 19 abríl kona-ba rejime jurídiku prátika Arte-Marsiál no Rituál sira, Arma Branka, inklui Rama Ambon no kinta alterasaun ba Kódigu Penál. Lei ne’e iha artigu hamutuk 43, ne’ebé hanesan lei espesífika.

Iha tinan-2017 nia laran, PN atualiza lei númeru 5/2017 kona-ba atividade Arte-Marsiál ho finalidade harii Komisaun Reguladór Arte-Marsiál (KRAM) ne’ebé tutela ba Sekretaria Estadu Juventude no Desportu (SEJD).

Lei ne’e mai hodi kriminaliza prátika no ilísitu Arte-Marsiál no prátika rituál sira iha kontestu GAM.

Bainhira implementa ona, entidade sira hanesan FALINTIL-Forsa Defeza Timor-Leste (F-FDTL), forsa seguransa, majistradu sira, ofisiál justisa, funsionáriu Estadu no ajente administrasaun públika mak sei sai responsável ba prevensaun no represaun ba atividade ilísitu sira ne’ebé ko’alia iha lei ho pena prizaun tinan 6 to’o 10.

Lei ne’e rasik hafoin públika, la konsege halo sosializasaun ba komunidade maibé alerta maka’as liu iha atuasaun.

Notísia Relevante:  Lei Prátika Arte Marsiál Boot Liu Rezolusaun Ba Ekstinsaun GAM

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here