Prezidente Parlamentu Nasional, Aniceto Longuinhos Guterres Lopez, .Imajen/Antonio Goncalves

DILI, 03 juñu 2020 (TATOLI)–Kompozisaun Meza Parlamentu Nasionál (PN) foun, aprezenta aan ona hodi kumprimenta mós Prezidente Repúblika (PR), Francisco Guterres “Lú Olo” no deklara katak kompozisaun ida-ne’e prontu atu serbí Parlamentu Nasionál.

Prezidente Parlamentu Nasionál foun, Aniceto Longuinhos Guterres Lopez, hato’o asuntu ne’e hafoin lidera meza hasoru malu ho Xefe estadu “Lú Olo” iha Palásiu Prezidensiál Nicolau Lobato, Bairru Pité, Dili.

“Ohin ami, meza Parlamentu Nasionál tomak mai hotu. Meza ida-ne’e ninia kompozisaun foun. Ami mai kumprimenta Prezidente Repúblika, informa no relata mós kona-ba situasaun Parlamentu nian, antes no depois de mosu alterasaun ba Prezidénsia ho meza PN to’o agora. Ami mai hatudu ba Prezidente Repúblika katak meza ida-ne’e prontu atu serbi Parlamentu Nasionál, orgaun soberania, prontu atu kolabora desizaun estadu, hodi hakotu impase politika,” Aniceto Guterres hateten ba jornalista sira.

Kompozisaun meza foun Parlamentu Nasionál nian ne’ebé hasoru-malu ho Prezidente Repúblika mak hanesan, Prezidente Parlamentu Nasionál Aniceto Longuinhos Guterres Lopez, Primeira Vise  Prezidente Angelina Lopes Sarmento, vise segundu Luis Roberto da Silva, sekretária meza Lidia Norberta dos Santos, Primeiru Vise sekretária meza Antónino Nobre Tilman, no segunda sekretária meza Regina Freitas.

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here