Primeiru-Ministru, Taur Matan Ruak prezide reuniaun Konsellu Ministru iha Palásiu Governu, kuarta (03/06). Imajen Tatoli/Egas Cristovão

DILI, 03 juñu 2020 (TATOLI) – Governu liuhosi reuniaun Konsellu Ministru aprova proposta lei ne’ebé aprezenta hosi Ministru Finansa, Fernando Hanjam, ba alterasaun dahuluk lei númeru 14/2009, loron 21 outubru kona-ba Estatutu Remuneratóriu ba Titulár Kargu Polítiku sira.

Ministru ba Prezidénsia Konsellu Ministru, Fidelis Manuel Leite Magalhães, informa remuneratóriu hamutuk $20.000 ne’e sei benefisia Membru Governu ne’ebé durante ne’e hanesan vise-ministru no sekretáriu estadu maibé asume mós pasta nu’udar ministru interinu.

Tuir Fidelis durante ne’e iha Membru Governu na’in-haat maka asume kargu interina, maibé nia la temi naran.

“Ho alterasaun ida-ne’e, vise-ministru ka sekretáriu estadu sira ne’ebé subtitui kargu nu’udar ministru hodi ezerse funsaun ba períodu liu fulan tolu, sei simu remunerasaun ne’ebé kooresponde ba kargu ministru nian, hahú husi loron ne’ebé hahú ezerse funsaun tuir rejime subtituisaun nian to’o nia mandatu ramata,” relata Ministru Fidelis liuhosi konferénsia imprensa iha Palásiu Governu, kuarta ne’e.

Diploma ne’e, hahú nia efeitu iha loron ne’ebé VIII Governu Konstitusionál simu pose.

Remuneratóriu ne’e la inklui ba ministru sira ne’ebé asume mós ministru interinu, ezemplu hanesan ba kargu Ministru Reforma Lejizlativa no Asuntu Parlamentár, ne’ebé antes ne’e Fidelis Menuel Leite Magalhães maka asume kargu ne’e, maibé iha tempu hanesan asume mós kargu nu’udar Ministru Koordenadór Asuntu Ekonómiku interinu.

“Remunerasaun ne’e la’ós ba ministru sira iha kazu ida-ne’e, hanesan ha’u rasik no mós Ministru Agio ne’ebé mak halo servisu boot, asume hela kargu ministru interina durante tinan-rua nia-laran ba fatin mamuk sira, atu nune’e Governu bele la’o. Ami sira ne’e la inklui, ba sira ne’ebé ministru ona simu nafatin vensimentu hanesan ministru nian, ne’ebé la inklui iha alterasaun ida-ne’e. Só vise-ministru mak simu tanba durante ne’e simu vensimentu hanesan vise-ministru, nune’e mós sekretáriu estadu ne’ebé sira halo kna’ar ministru sira nian durante tinan-rua tomak,” esplika Fidelis.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here