Primeiru-Ministru, Taur Matan Ruak prezide reuniaun Konsellu Ministru iha Palásiu Governu, kuarta (03/06). Imajen Tatoli/Egas Cristovão

DILI, 03 juñu 2020 (TATOLI) – Governu liuhosi reuniaun Konsellu Ministru (KM) aprova projetu deliberasaun ne’ebé aprezenta hosi Ministru Finansa, Fernando Hanjam, hodi fiksa valór Dotasaun Orsamentu Temporáriu (DOT) ba fulan-juñu hamutuk millaun $122,3 inklui pagamentu ba empréstimu sira.

“Valór ne’e inklui mós millaun $3,3 hodi halo pagamentu ba Ró Nakroma II no millaun $7 hodi asegura pagamentu subsídiu estraordináriu porsentu 60 ba remuneratóriu iha ámbitu medida pakote sosiu-ekonómiku hodi fó apoiu ba empregu,” informa Ministru ba Prezidénsia Konsellu Ministru, Fidelis Manuel Leite Magalhães liuhosi konferénsia imprensa iha Palásiu Governu, kuarta ne’e.

Governante ne’e dehan, DOT iha fulan ne’e bainhira esklui tiha empréstimu hela millaun $115.

Totál orsamentu ne’e fahe ba kategoria hanesan bens no servisu, transfénsia públika, saláriu no vensimentu, kapitál dezenvolvimentu, no kontinua esklui kapitál menór tanba iha rejime duodesimál.

Antes ne’e, Vise-Ministra Finansa, Sara Lobo Brites, informa durante implementasaun Estadu Emerjénsia Governu ladún iha atividade tanba ne’e maka gastu reál mensál hamutuk pur volta millaun $56 to’o $65.

Governu fiksa DOT ba fulan-maiu nian ho montante millaun $122 (inklui empréstimu) maibé bainhira esklui empréstimu millaun $114, ne’ebé fahe ba kategoria haat hanesan saláriu no vensimentu millaun $17,852, bens no servisu millaun $44,894, transferénsia públika millaun $26,591, no kapitál dezenvolvimentu millaun $26,242, esklui kapitál menór.

DOT ba fulan-abríl 2020 iha ámbitu rejime doudesimál ho montante $114.887.000, la inklui empréstimu.

Ba fulan-marsu ho montante $116.449,057, ne’ebé husi totál ne’e fahe ba kategoria saláriu no vensimentu hamutuk $17.852,076, kategoria bens no servisu $38.614,980, transfénsia públika $16.591,048 no kapitál dezenvolvimentu $33.390,953, esklui kapitál menór.

Nune’e mós, aprova DOT ba fevereiru ho montante $116.449,057, ne’ebé totál despeza fahe ba kategoria haat hanesan saláriu no vensimentu $17.852,067, bens no serbisu $38.614,980, transferénsia públika $26.591,048, no kapitál dezenvolvimentu $33.390,953.

Dotasaun ba janeiru ho valór millaun $116, fahe ba kategoria saláriu no vensimentu hamutuk millaun $17,8, bens no servisu millaun $38,6, transferénsia públika millaun $26,6 no kapitál dezenvolvimentu millaun $33,4 no kapitál menór suspende tanba relativa ho prosesu aprovizionamentu.

Utilizasaun rejime duodesimál sura hosi prosesu aprovasaun Proposta Lei Orsamentu Jerál Estadu (OJE) 2020, ne’ebé seidauk konklui no la tama vigór iha 1 janeiru 2020.

Nune’e, rejime ne’e sei ramata automatikamente bainhira orsamentu 2020 tama iha vigór.

Regra no prosedimentu aplikasaun rejime duodesimál ba instituisaun Estadu hotu presiza prepara DOT bazeia ba prinsípiu rua mak hanesan dotasaun orsamentál kobre de’it despeza durante períodu la liu fulan ida no dotasaun orsamentál labele liu um doze avos (1/12) husi orsamentál ne’ebé define ona tuir Lei OJE númeru 13/2016.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here