Ministra Edukasaun, Juventude No Desportu, Dulce De Jesus Soares Hamutuk Embaixadora Amérika Ba Timor-Leste, Kathleen M. Fitzpatrick Seremonia Entrega Ekipamentus Husi Embaixada Estadus Unidus iha Timor-Leste ba MEJD, Hanesan Maskara no Seluk Tan Ne'ebe Sei Fo Ba Eskola Sira. Seremonia Sei Hala'o Iha Sentru Relasaun Publika MEJD, Vila-Verde, Dili Tersa (02/06).Imajen /Egas Cristovão

AILEU, 03 juñu 2020 (TATOLI)-Ministra Edukasaun Juventude no Desportu, Dulce de Jesus Soares, hateten sente la hakmatek bainhira Governu seidauk iha desizaun atu re-ativa hikas prosesu aprendijazen ba estudante sira iha Territóriu Timor-Leste.

“Ha’u la Hakmatek tan ne’e ha’u hakerek karta ba parseiru internasional sira ne’ebé servisu fó apoiu ba área edukasaun iha Timor-Leste hanesan Plan, UNICEF, no Embaixada sira hodi husu sira atu apoiu hodi re-ativa hikas eskola sira,” dehan Governante ne’e bainhira distribui apoiu ekipamentu prevensaun COVID-19 ba iha Eskola Ensinu Báziku Sentrál das Frlores, Munisípiu Aileu, kuarta ne’e.

Ministra nian karta eskrita ne’ebé hakerek ba parseiru dezenvolvimentu hanesan UNICEF, PLAN, Estadus Unidus Amérika (EUA), Embaixada Japaun no seluk tan ne’e hodi husu apoiu ekipamentu prevensaun surtu COVID-19 no daudaun ne’e balun hetan ona resposta.

Notísia Relevante :EUA Apoiu Máskara ba MEJD

Husi EUA iha loron hirak liubá apoiu ona máskara 15.000, Plan Internasionál no UNICEF iha kuarta ne’e apoiu tan tanki bee no mós ekipamentu propagasaun surtu coronavirus ba eskola públiku sira iha Munisípiu Aileu no Ainaro.

“Ha’u simu kontaktu husi parseiru sira resposta ida de’it sira prontu apoiu atu re-ativa hikas eskola iha Timor-Leste tanba ne’e ha’u agradese barak tanba sei iha ema atu ajuda labarik Timoroan sira atu fila-fali ba eskola,” tenik Dulce.

Notísia Relevante :Ajénsia Internasionál Rua Apoiu Ekipamentu COVID-19 ba Eskola 150

Mezmu parseiru sira fó ona apoiu, maibé Governante ne’e dehan tan rezultadu ikusliu maka tenki re-ativa ona prosesu aprendijazen ba estudante sira.

Ho kestaun ne’e maka nia promete sei esforsu atu servisu hamutuk ho Ministériu Saúde hodi aprova ona padraun ba prevensaun surtu COVID-19 iha eskola sira iha tempu badak.

“Agora kona-ba distansiamentu sosiál no fiziku, ekipa servisu Ministériu nian sei koordena ho eskola sira atu haree kestaun ne’e hodi halo limitasaun iha aula atu nune’e bele reforsa liután regras ne’ebé iha,” hateten Ministra Edukasaun Dulce de Jesus Soares.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here