Xefe Unidade ba Operasaun no Relasaun Internasionál iha Gabinete Prezidente Autoridade Rejiaun Administrativa Espesiál Oe-Cusse Ambenu no Zona Ekonomia Espesiál Sosiál Merkadu Timor-Leste (RAEOA-ZEESM-TL), Agustinho Caet. Imajen Tatoli/Cipriano Colo.

DILI, 02 juñu 2020 (TATOLI)–Xefe Unidade Operasaun no  Relasaun Internasionál iha Gabinete Prezidente Autoridade Rejiaun Administrativa Espesiál Oe-Cusse Ambenu (RAEOA), Agustinho Caet, rekoñese autoridade kontrata duni asesór sira bazeia ba nesesidade no kapasidade tanba sira halo duni servisu ne’ebé hatudu progressu.

“Los duni katak oras ne’e daudaun autoridade kontrata ona asesór sira ne’ebé iha tanba bazeia ba nesesidade no kapasidade. Asesór sira servisu duni no sira hatudu sira-nia prestasaun servisu,” Caet hateten ba Ajénsia TATOLI liuhusi telefonika, tersa ne’e, hodi responde ba petisaun hosi reprezentante povu Atoni ne’ebé hateten Prezidente autoridade Lugu kontrata asesór sira ho saláriu boot maibé la halo servisu no kada fulan han osan estadu saugate de’it.

Caet mós rekoñese, to’o oras ne’e seidauk iha investimentu tanba tenke kompriende katak situasaun Coronavirus (COVID-19).

“Sorte situasaun Coronavirus (COVID-19), se la’e ema mai investe ona tanba rezultadu hosi asesór sira-nia servisu hamutuk ho Prezidente autoridade no agora daudaun ita iha ona investór ne’ebé verbalmente ita halo ona komunikasaun, hein de’it atu asina kontratu ho investór sira ne’ebé atu mai investe iha ne’e,”  nia hateten.

Ezemplu, nia haktuir, iha ona investór hosi Indonézia ne’ebé hakarak atu mai koopera ho autoridade hodi sosa marungi hosi Oe-Cusse ba Indonézia, sosa karau no ma’ek maibé tanba COVID-19, movimentasaun internasionál taka entaun sira labele mai ne’e mak to’o oras ne’e seidauk bele mai atu investe.

“Agora autoridade mós planeia ona atu oinsá mobiliza no enkoraja komunidade sira iha suku 18 iha Oe-Cusse hodi kuda marungi, haki’ak karau, atu reforsa tan buat ne’ebé agora iha ona, nune’e mós kuda maek. Maibé, tanba movimentasuan iha rai laran mós durante fulan rua paradu, nune’e ita seidauk bele. Emprezáriu ne’ebé atu mai sosa marungi ne’e mai hosi Estadu Unidu Amérika (EUA) no konkorda ona, he’in de’it situasaun normál ita estabelese no antes ne’e emprezáriu ne’e sosa marungi husi Nusa Tenggara Timur (NTT) Indonézia,” nia esplika.

Nia informa, autoridade negosia ona ho emprezáriu internasionál ida hosi Jakarta Indonézia, atu mai hola karau hosi Oe-Cusse, tanba durante ne’e povu atoni susar atu faan sira-nia animál no autoridade sei fasilita ida-ne’e.

“Emprezáriu ne’e hosi nasaun viziñu Indonézia ne’ebé besik liu ita, hakarak los atu sosa karau hosi Oe-Cusse. Maibé tanba situasuan estadu emerjénsia ne’e mak seidauk bele realiza,” nia subliña.

La’os ne’e de’it, nia dehan, autoridade iha ona akordu ida tan iha área maritima, maski seidauk formál maibé iha ona komunikasaun atu lori mai tan ró ida ne’ebé sei hala’o operasaun Dili-Oe-Cusse lais liu ho durasaun oras haat de’it, atu fasilita di’ak liután povu Atoni iha movimentu.

“Ema sira-ne’e mai hosi Jakarta, autoridade ko’alia tiha ona, hein ezekuta de’it, bainhira situasaun COVID-19 la’o normál fila-fali. Ita la presiza buat barak maibé ita fó de’it lisensa ba sira,  depois sira hetan osan hosi billete ne’e de’it. Tanba ita hakarak atu investimentu ne’e  100% ba Atoni-oan, nune’e komunidade bele hetan benefisiu direta,” nia hateten.

Entretantu, foin lalais ne’e, reprezentante povu Atoni, hatama petisaun ba órgaun soberania tolu hanesan Prezidente Repúblika, Parlamentu Nasionál, no Governu, hodi ezije hasai Prezidente Autoridade Rejiaun Administrativa Espeiál Oecusse Ambenu (RAEOA), José Luis Guterres (Lugu), husi nia kargu tanba konsidera laiha kapasidade atu ukun.

Iha pontu Désimu segundu, sita katak, Prezidente autoridade kontrata no selu asesór prinsipál Ricardo Nheu ho osan $7.000 kada fulan, no Francelino Freitas, ho osan $6.500 kada fulan, atu halo promosaun no mobiliza invetsimentu ba RAEOA maibé realidade seidauk iha investimentu kiik oan ida no hela deit iha Dili hodi goza de’it povu nia osan.

Désimu Terseiru, kontrata asesór seniór ba asuntu polítika, Romeo Moises ho osan $5.000 kada fulan, maibé hela permanente iha Dili, no tuir loloos RAEOA la presija Asesór Politika.

Désimu kuartu, Prezidente RAEOA iha xefe gabinete rua, ida servisu iha Oecusse no ida seluk servisu iha Faról Dili ho saláriu boot maibé volume servisu kiik.

Désimu Kintu, kontrata Zezinho Gusmão hanesan adjuntu koordenadór no asesór legal ba servisu koorporativu no jestaun ba área aeroportu no navegasaun ho osan $6.500 kada fulan, maibé fulan hitu ona aviasaun ZEESM-TL nunka tun iha Oe-Cusse.

Notísia Relevante: Reprezentate Povu Atoni Hatama Petisaun Hasai Lugu hosi RAEOA

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here