Primeiru-Ministru, Taur Matan Ruak konvoka ekontru ho Parseiru Dezenvolvimentu iha Palásiu Governu, tersa (02/06). Imajen Tatoli/António Gonçalves

DILI, 02 juñu 2020 (TATOLI) – Primeiru-Ministru (PM), Taur Matan Ruak konvoka reuniaun ida ho parseiru dezenvolvimentu sira, hodi diskute liután kona-ba vizaun VIII Governu nian durante mandatu.

Parseiru dezenvolvimentu sira ne’ebé partisipa iha reuniaun ne’e maihusi organizasaun multilaterál hanesan Organizasaun Nasaun Unida (ONU) ne’ebé marka prezensa husi ninia Koordenadór Rezidente iha Timor-Leste, Banku Mundiál, inklui Programa Nasaun Unida ba Dezenvolvimentu (PNUD).

Ministru ba Prezidénsia Konsellu Ministru, Fidelis Manuel Leite Magalhães no Ministru Finansa, Fernando Hanjam, marka prezensa iha reuniaun ne’ebé realiza iha Palásiu Governu.

“Objetivu husi reuniaun ida-ne’e hodi rona orientasaun polítika kona-ba prioridade dezenvolvimentu Timor-Leste nian husi Primeiru-Ministru no bele loke dalan ba oin atu nune’e iha mandatu VIII Governu nian bele halo konsertasaun di’ak liután iha prioridade sira. Ita mós bele kapitaliza apoiu husi parseiru dezenvolvimentu sira nian”, relata Fidelis hafoin reuniaun, tersa ne’e.

Tuir governante ne’e, konteksu ne’e haree hosi parte Prezidénsia Konsellu Ministru nian atu ajuda tradús vizaun hirak ne’ebé Primeiru-Ministru transmite iha asaun ba liña ministeriál sira.

“Bainhira presiza di’ak liután apoiu tékniku no rekursu husi parseiru dezenvolvimentu sira, ita bele konserta Kooperasaun hirak ne’e atubele ajuda tradús orientasaun polítika ba asaun”, nia realsa.

Pontu importante balun ne’ebé konklui iha reuniaun ne’e maka komunidade internasionál iha Timor-Leste atu hanoin apoia Governu atinje objetivu dezenvolvimentu ne’ebé Governu trasa ona.

Nune’e mós, parseiru dezenvolvimentu sira lakohi hambriik iha ninin maibé hakarak involve direta liuhosi mekanizmu komunikasaun no koordenasaun ne’ebé di’ak liután ho Governu Timor-Leste no sira prontu atu disponibiliza sira-nia rekursu tantu tékniku no rekursu sira seluk.

Jornalista: Antónia Gusmão

Editora: Julia Chatarina

1 KOMENTÁRIU

  1. Obrigadu ba notisia. Hakerek nain kobre ema hotu be partisipa iha enkontru nee maibé lee-nain la konsege lee kona saida mak governu ninia prioridade dezenvolvimentu (liu-liu iha tinan rua ba oin). Sujestaun: Jornalista no editora presiza lee barak nunee bele hatuun berita nebee informativu. Favór, labele copy paste los deit. Fiar katak ita bele halo diak liutan. Boa caça.

HAKEREK NO HATÁN

Please enter your comment!
Please enter your name here