Lider Karizmátiku, Kay Rala Xanana Gusmão anima labarik sira iha Suku Kulu-hun, Munisípiu Dili, hodi selebra loron mundiál labarik nian, segunda (01/06/2020) Imajen/Eugénio Pereira

DILI, 01 juñu 2020 (TATOLI) – Loron 01 juñu 2020, nu’udar loron Mundiál ba labarik sira.  Tanba ne’e,  lider karizmátiku, Kay Rala Xanana Gusmão, dezafia labarik Timor-Leste atu hakas-aan estuda hodi prepara sai ema matenek ba sira nia aan, família, sosiedade no futuru dezenvolvimentu Timor-Leste.

Notísia Relevante : Xanana Ajuda Reabilita Gruta Kapela Bedois

“Ami labarik Kulu-hun ohin selebra loron mundiál labarik iha uma de’it, ami deklara sei estuda maka’as atu sai ema di’ak ba ami nia-aan, ba ami nia família, sosiedade no ba ami nia nasaun Timor-Leste, viva labarik Timor-Leste,” dehan Xanana  hodi anima labarik sira hodi komemora loron mundiál labarik ne’e hamutuk ho labarik sira husi Suku Kulu-hun, Dili.

Labarik treinu Taekwondo. Imajen/Eugénio Pereira

Xanana apela mós ba inan-aman inklui profesór sira atu motiva labarik sira atu dezenvolve sira-nia talentu no rekursu umanu ba futuru bele lori Timor-Leste riku ho rekursu umanu.

Xanana hateten, ba tinan ida ne’e  eskola hotu iha mundu no Timor-Leste feriadu, tanba surtu COVID-19, mas labarik sira bele aproveita estuda iha uma de’it, too eskola loke sira bele ba, maibé tenke kumpre nafatin regra distánsia sosiál no fase liman  ho sabaun beibeik.

Xanana dehan, estadu iha obrigasaun kria edukasaun di’ak ba labarik sira hodi bele próteze direitu fundamentál sira ne’ebé hatuur ona iha polítika Governu nian.

Iha fatin hanesan, labarik Quemelita Isaac, tinan10, hato’o agradese ba vizita Xanana Gusmão hodi motiva sira atu badinas estuda no aprende bei-beik.

“Ami agradese tebes, ohin avó Xanana bele mai anima ami hodi selebra loron mundiál labarik sira,” hateten Quemelita Isaac ho nia kolega sira.

Labarik treinu Taekwondo. Imajen/Eugénio Pereira

Iha selebrasaun loron mundiál labarik ne’e, Xanana akompaña husi ekipa jornalista sira fahe mós dosi ba labarik sira, inklui halo atrasaun treinu Taekwondo no promote fó apoiu ekipamentu desportu  ba grupu labarik sira ne’ebé tuir treinu Taekwondo.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here