Inundasaun iha área Ponte Maufelo, Dili, iha loron 13 marsu hafoin udan boot. Imajen Tatoli/António Gonçalves

DILI, 02 juñu 2020 (TATOLI) – Atu halo rekuperasaun ba obra Estadu hanesan estrada, ponte no eletrisidade inklui rede bee moos ne’ebé hetan estragu kauza inundasaun husi udan boot iha 13 marsu, hein kontratu entre Ministériu Obra Públika (MOP) no kompañia sira.

Diretór Jerál Obra Públika, Rui Hernani, informa atu halo rekuperasaun falta de’it Ministru Obra Públika, Salvador Eugênio Soares dos Reis Pires asina kontratu ho kompañia sira atu hahú obra.

“Maski iha dezentendimentu iha invoce. Liuliu iha kustu orsamentu maibé hein de’it asina ona atu kompañia sira hahú rekuperasaun iha terrenu”, tenik Diretór Jerál ne’e ba Agência Tatoli iha ninia kna’ar fatin, Bebora, tersa ne’e.

Nia informa, hafoin ekipa interministeriál halo identifikasaun no hatama ba Komisaun Nasionál Aprovisionamentu (CNA, sigla portugés), hamutuk kategoria projetu emerjénsia pakote 16, husi estrada no ponte 10 no rede bee moos hamutuk 6, la inklui eletrisidade.

“Nia totál seidauk partilla, maibé ne’e prosesu kontratu preparadu hotu ona no entrega ona ba Gabinete Ministru Obra Públika nian. Maibé iha preperasaun kustu ne’e mak sala oituan ne’ebé Sekretariadu Grande Projetu (SGP) halo hela retifikasaun molok Ministru Salvador asina kontratu ho kompañia sira”, Dirijente ne’e adianta.

Kona-ba kompañia ne’ebé sei toma konta ba obra ne’e, Diretór ne’e seidauk bele anunsia tanba seidauk iha kontratu.

“Ami la ko’alia ba rekuperasaun uma-kain, maibé ami haree liu ba infraestrutura ne’ebé hetan afetadu husi inundasaun hanesan estrada no ponte kuaze millaun $10, ba eletrisidade millaun $3-resin no ba bee-moos kuaze $700.000, maibé orsamentu ne’e sei la gasta hotu”, nia subliña.

Antes ne’e, Ministru Salvador informa ekipa Task Force hahú rekomenda kompañia sira ba parte CNA atu halo kontratu tuir parte legál hodi halo rekuperasaun ba obra ne’ebé estraga durante dezastre naturál iha marsu.

Konsellu Administrasaun Fundu Infraestutura (KAFI) aprova ona millaun $15 ba kustu estimasaun ba rekuperasaun estragu, ne’ebé aprezenta husi ekipa Task Force rasik ne’ebé lidera husi Ministériu Planeamentu, Investimentu no Estratéjiku (MPIE) no MOP.

Ekipa Task Force, kompostu husi ministériu rua ne’ebé aprezenta ona kustu estimasaun hodi bele halo rekuperasaun ba estrada, ponte, eletrisidade, kanalizasaun bee-moos no eskola sira kuaze obra emerjénsia hamutuk 23, ne’ebé maioria lokaliza iha kapitál Dili, inklui munisípiu balun ne’ebé afetadu husi inundasaun.

KAFI identifika ona lokál hamutuk 23 ne’ebé sei halo rekuperasaun emerjénsia ba estrada, inklui hadi’a ponte tolu hanesan My Friend, Becusse, Hera, retensaun ba barreira sira, estrada no hadi’a Eskola 5 de Maio, Sergio Veira de Melo no seluk tan.

Ekipa Task Force estabelese bazeia ba despaisu husi Primeiru Ministru, Taur Matan Ruak, husi rezultadu enkontru ho KAFI, inklui entidade relevante sira hanesan Ajénsia Dezenvolvimentu Nasionál (ADN), CNA no SGP no mós ajénsia sira ne’ebé tutela iha MOP hanesan Diresaun Jerál Obra Públika, Servisu Agua Saneamentu (SAS) no Eletricidade de Timor-Leste (EDTL).

Jornalista: Florêncio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here