Ministru Agrikultura no Peska, Pedro Reis konvoka reuniaun dahuluk ho diretór no kargu xefia sira Iha sala reuniaun MAP, Comoro, tersa (02/06). Imajen/Mídia-MAP

DILI, 02 juñu 2020 (TATOLI) – Ministru Agrikultura no Peska, Pedro Reis konvoka reuniaun dahuluk ho diretór no kargu xefia sira Ministériu Agrikultura no Peska (MAP) hodi ko’alia kona-ba programa, dezafíu no atividade ne’ebé la’o ona inklui preparasaun orsamentu ba tinan 2020.

Ministro Pedro defende orsamentu sufisiente atu halo dezenvolvimentu no diversifika setór agrikultura, tanba nia konsidera orsamententu ne’ebé antes ne’e prevee ba MAP iha proposta 2020 sufisiente.

Orsamentu 2020 ba MAP hamutuk millaun $21,627, kompostu husi saláriu no vensimentu millaun $3,614, bens no servisu millaun $12,761, transferénsia públika millaun $214.000, kapitál menór millaun $1,645 no kapitál dezenvolvimentu millaun $3,392.

“Ha’u hanoin ba osamentu millaun $21 la to’o, tanba MAP nu’udar ministériu responsável ba área priodade, tanba ne’e presiza aumeta osan ba dezenvovimentu agrikultura, liuliu aumenta produsaun tanba agrikultura rasik iha sub-setór barak”, dehan governante ne’e iha sala enkontru MAP, Comoro, tersa ne’e.

Nia dehan, nu’udar membru governu foun ne’ebé asume resposablidade iha área agrikultura nian, promete sei kontinua obra ne’ebé maka antes ne’e ministru sesante hala’o ona.

“Ha’u hanoin ministru maka troka malu maibé programa la troka malu, tanba ne’e ita sei kontinua programa saida maka ministru sesante halo ona”, nia akresenta.

Nia haktuir, liuhosi reuniaun ho diretór no kargu xefia sira nia orienta ona atu hahú prepara ida-idak ninia planu prioridade sira, atu nune’e karik iha ona osamentu 2020, bele iha mós programa prioridade hodi ezekuta.

“Ha’u ohin orienta hahú halo planu hodi tau osamentu, hafoin servisu nu’udar membru governu tuteladu iha área agrikultura nian sei defende hodi fó prioridade ba dezenvolvimentu setór agrikultura rasik atu nune’e bele rezolve problema no preokupasaun ne’ebé povu agrukultór sira iha”, nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here