Promotora ba foinsa’e Timor-Leste, Maria Vitória. Imajen António Gonçalves

DILI, 01 juñu 2020 (TATOLI)–Advogada ba Labarik no Foinsa’e sira iha Timor-Leste, Maria Vitória “Marvi” da Costa, hateten agradese bele sai hanesan matadalan ka motivadora ba ema seluk tanba bele fó buat ne’ebé nia bele fó.

“Hanesan advogada ba labarik sira iha Timor-Leste, sai hanesan matadalan, sente toˋo agora dezafiu laiha no haˋu enjoy deˋit ho buat neˋebé haˋu bele halo no haˋu bele fó,” dehan Maria Vitória ba Aj’ensia TATOLI iha nia rezidensia, Aitarak-Laran, Dili, segunda ne’e.

Vensedora The Voice Portugal neˋe informa, to’o oras ne’e seidaˋuk halaˋo servisu tuir orientasaun hosi Fundu Nasaun Unida ba Labarik (UNICEF, sigla inglés) maibé iha ona planu ba tinan ida-neˋe, atu visita labarik sira iha kada munisípiu.

“Servisu hosi UNICEF ami seidaˋuk halaˋo, maibé iha planu katak tinan ida-neˋe, ami sei la’o hodi ba haree labarik sira iha kada distritu. Ba distritu neˋebé labarik barak menus liu saúde, menus liu tratamentu ba edukasaun, menus liu ba tratamentu saida deˋit, iha kada distritu mak ami tenke ba,” nia dehan.

Kantora timoroan neˋe haktuir, tinan ida ona serbisu hanesan advogado ba labarik iha Fundu Nasaun Unida ba labarik (UNICEF, sigla inglés) maibé seidaˋuk iha atividade hodi bele visita ba labarik sira.

“Durante neˋe ami so iha deˋit eventu hamutuk ho joven no labarik sira. Entaun iha momentu neˋe, ha’u foin tuir eventu neˋe dala rua no dala tolu,” nia hateten.

Nia reforsa, liga ba komemorasaun loron mundiál labarik nian, nia haree diferensa tebes ho tinan sira ba kotuk tanba labarik barak mak sira-nia moris loro-loron ne’e iha sitausaun silénsiu nia laran.

“Agora labarik sira tenke halaˋo sira-nia loron ho situasaun neˋebé silénsiu tebes. Ita hatene katak labarik sira gosta buat neˋebé barullu, buat neˋebé rame, hamutuk ho sira-nia kolega, maibé ho pandemia COVID-19 neˋe rasik, tahan sira-nia atividade neˋebé durante neˋe sira halo hanesan rutinidadr ne’e lakon, entaun haˋu sente triste,” nia dehan.

Advogada ba labarik iha Timor-Leste hein, pandemia COVID-19 neˋe bele hotu laˋos deˋit iha Timor maibé nasaun sira neˋebé agora afeta ba surtu COVID-19, espera bele menus no bele sai fali mundu ida neˋebé mak livre, mundu neˋebé bele dada iis hosi buat hotu.

Maria Vitória sente triste tanba labarik sira la goza sira-nia direitu hanesan labarik sira seluk, neˋebé bele asesu ba buat hotu liuliu ba edukasaun maibé balun ho situasaun obriga sira tenke halaˋo serbisu hanesan ema boot nian hodi halo negósiu.

“Iha Timor, sei barak tebes buat sira ne’e akontese ba labarik sira. Labarik sira presiza halimar, sira presiza espresa buat saida mak sira bele halo liuliu eskola. Ida-neˋe importante tebes tanba eskola mak forma sira atu sai diˋak ba futuru. Haˋu laˋos atu julga fali inan-aman sira maibé ita nuˋudar umanu nuˋudar ema ida, liliu haˋu sai hanesan advogada ba labarik sira, entaun iha neˋeba haˋu tenke koˋalia ba ida-nee, nia esplika.

Tanba ne’e, nia husu atu inan-aman sira tenke komprende ba labarik sira-nia situasaun, liuliu ba labarik sira ita bele buka osan maibé primeiru haree ba sira-nia futuru. Bainhira ita inan-aman iha forsa nusa mak labele.

Vensedora the Voice Portugal neˋe hateten, liuhusi loron mundiál ba labarik hotu iha mundu, espesiál ba labarik iha Timor-Leste katak agora dadaˋuk sente triste tanba pandemia COVID-19 neˋe tahan hotu labarik sira-nia direitu no atividade.

“Tahan sira-nia eskola no tahan buat hotu. Husu ba ita, liuhosi buat sira-neˋe, ita só bele reza para pandemia COVID-19 neˋe bele hotu lalais no ita bele halaˋo fali atividade. Ba labarik sira bele hasoru malu ho sira-nia kolega iha eskola ho kontente. Dala ida tan rona inan-aman, eskola didiˋak, estuda makaas, hakerek istória agora hodi nuneˋe sai diˋak ba futuru. Timor mak ita no ita mak Timor,” Marvi hateten.

Ba inan-aman sira, nia apela, timoroan hotu koko atu rona malu no koko atu rona oan sira-nia lian. Buat saida mak labarik sira hakarak halo no sira hakarak espresa, husik sira halo. Inan-aman presiza hatudu dalan ba oan sira atu laˋo ba dalan diˋak.

Notísia Relevante: UNICEF Estende Kontratu ho Marvi Nu’udar Advogada ba Foin-sa’e

Jornalista : Nelia Fernandes

Editór     : Cancio Ximenes

HAKEREK NO HATÁN

Please enter your comment!
Please enter your name here