Prezidente Autoridade RAEOA, José Luís Guterres ‘Lugu’ entrega nesesidade bázika ba orfanatu Topu Honis, Kutete, segunda (01/06). Imajen/Mídia-RAEOA-ZEESM,TL

DILI, 02 juñu 2020 (TATOLI) – Prezidente Autiridade Rejiaun Administrativa Espesiál Oé-cusse Ambeno (RAEOA) no Zona Ekonomia Espesiál Sosiál Merkadu (ZEESM) Timor Leste, José Luís Guterres simbolikamente entrega nesesidade bázika ba orfanatu Topu Honis, Kutete. 

Nesesidade bazika ne’e hanesan asaun solidaridade husi Prezidente Autoridade ne’ebé promote ona iha nia vizita dahuluk iha loron 14 maiu. 

“Ohin ha’u mai entrega nesesidade bázika ba ita-nia oan kiak sira iha orfanatu Topu Honis. Ami entrega ai-han sira ne’e ba labarik sira hamutuk 103, inklui inan-feto hodi sira bele augenta sira-nia moris loron-loron iha orfanatu ne’e”, refere nota imprensa ne’ebé Agência Tatoli asesu, tersa ne’e.

Prezidente RAEOA agradese ba PT Wijaya Karya (Persero), Tbk no PT Pertamina International Timor, SA ne’ebé oferese nesesidade bázika.

Iha sorin seluk, Orfanatu Teus Soares ho idade 12 agradese no sente kontente ba apoiu nesesidade bázika husi Autoridade RAEOA.

“Ha’u agradese ba Prezidente Autoridade tanba hanoin ami hodi apoiu foos. Apoiu ne’e sei ajuda ha’u atu han no estuda di’ak”. 

Entretantu, Koordenadora Orfanatu Topu Honis, Liliana Tarung sente orgullu tanba Prezidente Autoridade diretamente mai iha orfonatu hodi intrega direta nesesidade bázika ne’e. 

“Prezidente Autoridade fó nia tempu espesiál hodi lori prezente furak ne’e ba ami. Ha’u ho labarik sira-nia naran hakarak hato’o ami-nia agradese ba Prezidente Autoridade no Maromak de’it mak sei selu nia favór ba ajuda ida-ne’e”, Koordenadora ne’e hato’o  agradesementu.

Nia dehan, apoiu no vizita ne’e hanesan supreza boot ida ba sira tanba sira moris iha área remota no vizita espesiál husi entidade altu nível ne’e seidauk akontese. 

“Autoridade RAEOA apoiu foos saku 50, supermi kaixa 50 no nesesidade bázika seluk tan. Ha’u fiar katak ami bele konsume maizumenus fulan-haat to’o lima tanba ami akompaña ho ai-han lokál sira seluk”, dehan koordenadora Liliana. 

Sasán nesesidade bázika ne’e entrega diretamente husi Embaixadór Indonésia iha Timor-Leste, iha loron 26 maiu iha eskritóriu ZEESM Dili hodi entrega ba família kbi’it la’ek no oan kiak iha RAEOA.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here