Ministru Justisa, Manuel Cárceres da Costa. Imajen/Egas Cristovão

DILI, 02 juñu 2020 (TATOLI) – Ministru Justisa (MJ), Manuel Cárceres da Costa, tersa (02/06/2020), afirma katak, Guarda Prizionál sira  la nesesáriu atu hetan subsídiu ba suplementu remuneratóriu durante estadu emerjénsia tanba la tama iha ekipa liña frente luta kontra propagasaun Coronavirus ka COVID-19.

Notísia Relevante : Governu Rekoñese Servisu Guarda Prizionál Todan

“Prizaun la’ós fatin kuarentena no izolamentu. Nune’e, Guarda Prizionál mós la’ós ekipa liña frente, tanba ne’e lei la permite atu hetan subsídiu ba suplementu remuneratóriu,” afirma Ministru Manuel Cárceres da Costa, ba jornalista sira iha Tribunál Rekursu, Dili, hodi responde pedidu  Guarda Prizionál nian atu bele mós konsidera sira nia subsídiu ba suplementu remuneratóriu durante luta kontra propagasaun surtu COVID-19 iha Timor-Leste.

Ministru Justisa rasik simu ona karta pedidu husi estabelesimentu Prizionál tolu; Prizaun Becora, Gleno ho Suai, maibé ministru indefere ona pedidu ne’e ho razaun Guarda Prizionál la’ós  ekipa liña frente.

Antes ne’e, Diretór Guarda Prizaun Becora João Domingos, reprezenta Guarda Prizaun Becora husu Governu liuhusi Ministériu Justisa atu konsidera subsídiu ka insentivu suplementu remuneratóriu ba mós sira tanba durante hala’o kna’ar iha implementasaun estadu emerjénsia.

João Domingos argumenta katak, papél Guarda Prizionál  sira nian maske iha estadu emerjénsia la tama iha ekipa liña frente COVID-19, maibé kontinua kuidadu no tau matan ba prizioneiru sira, inklui serbisu hamutuk ho parte saúde liu-liu iha prizaun laran halo diagnóstika ba prevensaun COVID-19.

Notísia Relevante : Presiza Konsidera Insentivu ba Guarda Prizionál

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here