Prezidente Tribunál Rekursu, Deolindo dos Santos, fó posse ba Juiz Nain-haat (4) iha Tribunál Rekursu, Tersa (02/06/2020). Imajen/Egas Cristovão

DILI, 02 juñu 2020 (TATOLI)-Prezidente Tribunál Rekursu (PTR), Deolindo dos Santos, afirma, juiz sira kumpre de’it ba konstituisaun ho lei, atu hasai desizaun ruma no sei la asegura ba ema indivíduu no grupu nia interese.

Notísia Relevante : PTR Fó Posse ba Juiz Na’in-Haat

Deolindo dos Santos hato’o lia hirak ne’e ba jornalista iha Tribunál Rekursu, Dili, tersa (02/06/2020), hodi responde preokupasaun públiku nian kona-ba independénsia no imparsialidade juiz sira iha Tribunál.

Prezidente Tribunál Rekursu, Deolindo dos Santos. Imajen/Egas Cristovao

“Primeiru, bainhira hanesan juiz nia jura atu kumpre no halo tuir konstituisaun ho lei, tanba ne’e labele kumpre ema A ka B nia hakarak,” afirma PTR Deolindo dos Santos.

Nia klarifika, desizaun tribunál nian iha mundu tomak sei la halo kontente ba parte rua hotu, sempre parte ida lakontente ho desizaun ne’ebé sai iha ida lakon no iha razaun.

PTR Deolindo dos Santos hateten, bainhira la kumpre regra prosesuál sira ne’e entaun sei la diskute kona-ba méritu.
“Saida mak akontese hanesan kazu ita hotu hatene, Tribunál Rekursu indefere tiha pedidu sira ne’ebé mai tanba la prienxe rekizitu sira ne’ebé regra prosesuál estabelese,” tenik Deolindo dos Santos.

Nia konsidera, preokupasaun públiku ne’e normál, bainhira desizaun tribunál nian sai ema hotu iha direitu atu fó nia komentáriu no opiniaun.

Jornalista : Nelson de Sousa

Editór       : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here